Tripura atanga Mizoram-a Bru hruaikir chhungkaw 13 te chhawmdawlna hlan fel an ni

Tripura atanga Bru hruaikir tum 8-na a Mizoram-a hruai kir te hnenah nimin khan Bru Repatriated Fix Deposit Certificate hlan niin hemi hmang hian chhawmdawlna sum an dawn tur Bank-a dah sak te chu an lachhuak thei dawn a ni.

Mamit DC Conference Hall-a he hun hmanna ah hian Mamit DC Dr. Lalrozama IAS chuan Tripura Relief Camp hrang hrang atanga Bru lo let te chu a tira Bank-a pawisa dah sak, Fix Deposit bak Sawrkar atanga chhawmdawlna dawn a awm tawh dawn loh avangin an pawisa dawnte chu tangkai tak leh dinchhuahpui ngei nan bakah mahni kutke a ding tura rilru fim tak nena hmang turin a chah a. An awmna khua theuhah khua leh tui tha tak ni tura chahin, rilru nghet tak pu-a Mizoram chhungah thlamuang taka awm turin a chah bawk. Mamit District Bawrhsap chuan Mamit District chuan mawina riau an nei tih sawiin, “Hnam hrang hrang chengte lungrual taka kan khawsak ho-na hi kan mawina a ni,” tiin an chhawmnun zel a pawimawh thu a sawi a. Bru unaute chu naupang hri danna pek leh zirna lamah pawh theihtawpchhuah zel turin a sawm bawk.

8th Batch Bru Repatriated-a hruaikir te hi an rawn let atanga kum hnih (2) chhung thla tin Rs. 5000/- Monthly Assistance pek an ni a, Free Ration pek an nih bakah In sakna tur tanpuina Rs. 1,50,000/- pek an lo ni tawh bawk a. Kum thum an awm tlin chiahin Apex Bank-a Fix Deposit an dah lakchhuah theihna Certificate chu pekchhuah theih niin hei hi nimin khan pekchhuah an ni a. Bank Certificate pekchhuah hmang hian chhungkaw khat tan cheng nuai 4 bakah kum thum chhunga a pung nen an la chhuak thei dawn a. Nimin-a Repatriated Fix Deposit Certificate hlan te hi chhungkaw 13 niin Tripura atanga an rawn let atanga chatlak miah lova Mizoram-a kum thum chhung awmte an ni a. Chhungkaw khat erawh Tripura-ah an let leh avangin tanpuina hi an dawng ve thei dawn lo a ni. Nimin-a he hun hmanna ah hian Ration Card pangngai la neilote pek nghal an ni bawk.

Nimin-a Bru Repatriated Fix Deposit Certificate pekchhuahna-ah hian Project Director, DRDA Mamit, Bru Repatriation Nodal Officer te, anmahni Bialtu AO theuhte, Apex Bank Manager bakah DIPRO, Mamit te an tel a ni.