Latest News

MNF Party buatsaihin Aizawl-ah ‘Mizo Hnam Martar te Ni’ vawi 42-na hman a ni

MNF Party chuan nimin, September 20, 2021 khan ‘Mizo Hnam Martar te Ni’ vawi 42-na hmangin he ni pual hian MNF General Hqrs. buatsaiha hun hman a ni a, Hnam Martar te sunna neiin zahna pangpar dah a ni bawk.

Aizawl Vanapa Hall-a ‘Mizo Hnam Martar te Ni’ puala hun hman ah hian MNF OB-te leh Frontal President-ten Hnam Martar te zahna pangpar dahin Ram leh hnam tana nunna hlantu Martar te sunna hun an hmang a, he hunah hian MNF President, Zoramthanga chuan he ni hi kumtin September ni 20-ah hman thin tur niin, Mizo hnam ni pawimawh taka hman tur a nih dan leh Martar te Thlanmual enkawl dan pawh siamfel thuai a nih tur thu a sawi a ni. Zoramthanga chuan Martar te thih chhan - Nationalism chu ram leh hnam dinchhuahna a ni tih sawiin, “Nationalism chu hnam dang pawhin an nei ve vek. MNF chuan Nationalism kan tih hian 'Pathian leh kan ram tan' kan ti a, ram tan chauh ni lovin Pathian tan tih a tel, hei hi kan danglam bikna a ni,” a ti.

He huna thusawitu MNF Sr. Vice President Tawnluia pawhin Martar te puala program siam chu an phu tih sawiin, “He hun hi a hluin Mizoram tan a chhinchhiah tlak hle a ni,” a ti a. Martar te nun hlan dan sawiin, “Kum 1966-ah Pu Laldenga hovin Independence puan a ni a. India sawrkarin nasa zawka min awpbeh zui avangin kan nula tlangvalte an rammu ta a, ram leh hnam tan nun an hlan a ni. Chawimawi an phu a, zahna kan lantir a tul a ni. Mizo hnam kan dinchhuahna tura an inpekna hi Mizoram mipuiten i hai der lo ang u, i chawimawi zel ang u,” a ti.

Ex-MNA President Rochungnunga pawhin he hunah hian Hnam pasaltha inpekna leh harsatna an tawh dan te sawiin, Mizo nula tlangvalten mahni In luma kir leh inring tawh lovin nun thapin ram tan an inpek dan leh Zoram mipuiten nunphung pangngai kan neih theihna turin tam takin nun an hlan ta tih a sawi a. “Zalenna kan sual lai khan thih kan chak miah lo. Mahsela ram chhan tura kan fehchhuah chhan kan hria a, thih kan hlau miah lo,” a ti a. “Ram tana Martar mi sang chuangte hian an nunna an ui lo. Martar te tel lovin Mizo nationalism kan sawi thei lo. Keini hian an hmabak chhunzawm kan ba a ni,” a ti bawk.

Comments

Chhiar Hlawhte