Latest News

Cricket Final khel dawn

Cricket Association of Serchhip District in an buatsaih, Serchhip District Cricket League vawi khatna chu Vawiin chhun dar 12:00 hian Final khelh a ni dawn ta a, Tuikhuah Veng CC leh AO3C ten Final hi an khel dawn a ni. He inkhel hi TV lamah en theih tura pekchhuah leh a ni dawn a ni. Vawiin a Final khelh hi Cricket Association of Mizoram hotute pawhin an rawn hmanpui dawn a ni.

COVID-19 hri kai 1355 hmuh belh leh an ni

COVID-19 hri kai chu Mizoram-ah hmuhchhuah belh zel an la ni a, niminpiah khan Mizoram-ah Sample 8805 enfiah niin heng atang hian hri kai mi 1355 hmuhchhuah niin Sample enfiah atanga za zela 15.39 te chuan hri an kai a ni.

Niminpiah khan ZMC-a RT-PCR Laboratory ah Aizawl leh Serchhip District atanga Sample lak 1122 enfiah niin heng atang hian COVID-19 hri kai mi 324 hmuh an ni a, an zinga 318 te chu Aizawl District-a Sample lak te niin Salem Veng atangin hri kai mi 44 lai hmuh belh leh an ni a, hei bakah hian hri kai mi 10 leh a aia tam hmuhna Veng leh khua 9 a awm bawk. Serchhip District atanga ZMC-a hri kai hmuhchhuah te hi mi 6 niin an vai hian Thenzawl khua an ni a, mipa vek niin Negative Certificate mamawh avanga Sample Test niin hri kaina hriatloh an ni.

Fluorescent Immunoassay Test hmangin niminpiah khan Aizawl ah Sample 206 enfiah ni bawkin heng atang hian hri kai mi 30 hmuh an ni bawk a, an vai hian Aizawl khawpui chhung ami te niin hri kaina chhui ngai deuh vek an ni a. District hrang hranga TrueNat Laboratory-ah Sample 288 enfiah ni bawkin heng atang hian hri kai mi 56 hmuh an ni bawk a. An zinga 24 te chu Lawngtlai District-a hri kai hmuh te niin Siaha District-ah 11, Serchhip District-ah 9, Champhai District-ah 4, Kolasib leh Hnahthial District-ah hri kai mi 3 ve ve hmuh niin Lunglei District-ah hri kai mi pahnih hmuh an ni bawk.

Rapid Antigen Test hmangin niminpiah khan Sample 7189 enfiah ni bawkin heng atang hian hri kai mi 945 hmuh an ni bawk a, an zinga 562 te chu Aizawl District atanga hri kai hmuh te niin Dinthar Veng Restricted Area atangin hri kai mi 84 zet hmuhchhuah an ni a, Veng leh khua 11 atangin hri kai mi 10 aia tam hmuhchhuah an ni bawk. Heng bakah hian Siaha District atangin hri kai mi 123 hmuh niin Lunglei District atangin hri kai mi 56 hmuh an ni bawk a, Mamit District atangin hri kai mi 45 hmuh an nih bakah Kolasib District atangin 44, Serchhip District atangin 32, Champhai District atangin 29, Lawngtlai District atangin 26, Khawzaw District leh Hnahthial District atangin hri kai mi 14 ve ve hmuh an ni bawk.

Mizoram-a COVID-19 hri kai zingah nimin khan mi 521 te chu enkawl dam ni lehin nimin tlai dar 5:00 thlenga Mizoram-a hri kai hmuh tawh chu 82,815 an ni a, an zinga 67,705 te chu enkawl dam niin hei hi hri kai hmuhchhuah atangin zaa 81.75 a ni a, tunah hian hri kai enkawllai 14,840 an awm mek a ni.

Nimin tlai dar 5:00 thleng khan Mizoram-a hri kai zingah mi 270 boral tawhin nimin zing dar 5:15 khan Sangtuahkhupa (75), Chawngtelui chu Lunglei DCHC-ah boralin nimin chawhnu dar 1:00 khan T. Hmangaihzama (61), Venglai Lunglei chu ZMC-ah a boral ve leh bawk.

Comments

Chhiar Hlawhte