Latest News

Chanchin thar thenkhat :

Zirlaite harsatna enpui

Siaha District-a Tipa SDO (Civil), Lalhmingliana chuan nimin khan Siaha District Myanmar ramri depa awm khua Mawhrei leh Chapi a zirlai te Online Class kal dan a hmunah a enpui a. Heng khua ah te hian Airtel Tower awm mahse 2G Network chiah a awm avangin zirlai ten harsatna nasa tak an tawk mek a, Online Class kal turin khawchhung atanga KM 3 vel laia hla a an kal a ngai thin a, chawlhbuk hi hmun 4 ah an mahni in an rel chawp mai thin a ni. He hunah hian zirlai ten Network tha an mamawh thu leh Chawlhbuk chung tur Rangva an mamawh thu te lo thlenin, SDO (C) chuan Network tha an neih theih nan theihtawp chhuahsak a tum thu leh an chawlhbuk khuhna tur Rangva ngaituahsak a tum thu a sawi a, tuna an mamawh zual phuhrukna turin Silpaulin leh Rs. 2000/- a hlan bawk.


Cake siam zirna nei tan

Mizoram Youth Commission (MYC), Sub-Hqrs. MHIP Champhai, Medhavi Foundation leh District Skill Committee tangkawp buatsaih Cake siam inzirtirna, Cake Baking Training chu nimin khan Champhai-ah neih tan a ni a, he training hi District Bawrhsap Maria CT. Zuali chuan hawngin Cake siam bakah Food Processing inzirtirna kalpui thuai tum a nih thu a sawi a, khawl leh thiamna hmanga ei leh in sawngbawl kawngah hmasawnna nei tura tanlak a nih thu a sawi bawk. Champhai-a Cake siam zirna turah hian Cake siam lama tui mi MHIP member mi 22 te an inziaklut a ni.


Officer kaisang te lawmpui

Mizoram Govt. Departmental Officers Association (MDOA) chuan tunhnaia an member an hna a kaisang te lawmpuina hun nimin khan Aizawl-a I&PR Office-ah an buatsaih a, he hunah hian Deparment 12 atangin Officer 67 te hnenah lawmpuina thuziak an hlan a ni. He hunah hian an President Lalchuailova chuan kum 1982-a an pawl din atangin tun tum hi tumkhat-a kaisang an lawmpui tam ber a nih thu a sawi bawk.


Sumdawnna ah hmalak tum

Mizoram Merchant Association (MIMA) huaihawtin nimin khan Aizawl-a Zarkawt Local Council, Dawrpui Local Council, Panhnah leh Kuhva Zuar Association te chuan Joint Meeting neiin ram leilung fa ten sumdawnna an tih ve theih reng thila hnamdangten Mizoram a sumdawnna an thunun tlat chu tha an ti lo tih sawiin, Hnamdang ten Mizo hming hawha sumdawnna an kalpui hi titawp tawh se, Mizote pawhin hming hawhtir tawh lo se an ti a. Chumi tur chuan hmalak ho an rel bakah he hmalakna hian Pahnah leh kuhva chauh a huam lova, Iron and Cement, Eichawp leh Materials supply thleng a huam dawn tih an sawi bawk.


ZPM in mithar lawmluhna nei

ZPM Party chuan nimin khan Aizawl-a ZPM Conference Hall-ah mithar lawmluhna hun an hmang a, he hunah hian party Working President K. Sapdanga chuan tunah hian Unit thar 736 leh Block 55 an din thar tih sawiin, “ZPM Party-ah hian mi hrang hrang tum thuhmun neiin kan awmkhawm a, kan tum chu ‘Ram leh Hnam siam that’ a ni,” tiin “Keini ZPM-te chu nihna leh chanvo-ah kan buai tur a ni lova, therhlo leh eirukna lakah te kan fihlim theihna turin Pathian chakna ringin Ram leh Hnam tungding turin inlungrual takin kan thawkho tur a ni,” a ti.


Hlawhchhamna a midang puh tel ah MNF puh

Mizoram Pradesh Congress Committee (MPCC) chuan Hripui, COVID-19 dona kawnga MNF sawrkar hlawhchham zia a taka mipuiin kan tawn mek laiin, rin lawk ang ngeiin MNF chuan an hlawhchhamna chhanah Kohhran leh NGO bakah khawtlang hruaitute an puh tel ve tih nimin khan thuchhuah siamin an tarlang a. “An hlawhchhamna a dem an kai palh theih avangin invenna atan hripui dona kawngah thutlukna pawimawh an siam dawn reng rengin Kohhran hruaitute, NGO hruaitute leh khawtlang hruaitute an hnuklut lui tlat thin a ni,” tiin hei hian hripui dona kawnga MNF Party thil tum pakhat chu chiang takin a tarlang niin an sawi.


Raltlan rawn luh belh zel

Sangau khaw chhungah Myanmar atanga raltlan chhungkua 147 atangin member 707 an awm mek a, raltlante zinga engemaw zat hi Home Quarantine lai an ni a, heng Home Quarantine te chhuah huna an awmna tur, Refugee Camp pawh Sangau khawchhung hmun hrang hrangah VC leh NGO te hmalakna in sak zawh an ni tawh a. Heng bakah hian Sangau khaw bul hnaite ah YLA Sub-Hqrs. Sangau hmalakna in Refugee Camp lian tak sak mek a ni bawk.

Thudawn danin Myanmar ram buaina avanga sahimna zawnga mahni khua leh In leh lo tlanchhuahsan, Mizoram rawn lut rih chiahsi lo mi 6000 vel chu tunah hian Myanmar ram chhung, International border bulhnai thingtlang khaw hrang hrangah an la awm mek a ni.

Hetihlai hian Champhai Sub-Hqrs. YMA chuan Myanmar atanga Mizorama raltlan rawn lutte chu Relief Camp-a awm lo emaw, khawtlang hriatpui emaw-a awm lo te chu raltlan-a pawm loh nise an ti a, an huamchhunga raltlan rawn lut te chu Sawrkar inkaihhruaina anga COVID-19 Test vek tura an hriattir bakah an awmna hmun emaw, Relief Camp an chhuahsan dawnin emaw an awmna Branch YMA te hriattir tur leh Relief Camp chhungah ruihhlo la lut lo turin an ngen bawk a. Raltlan te chu a theih anga lo dawnsawn zel nise an ti bawk.

Comments

Chhiar Hlawhte