Mizoram-ah hri kai hmuh tam ber ni thleng leh ta

Mizoram-ah COVID-19 hri kai hmuhchhuah zat ala tlahniam thei tak tak lova, niminpiah khan Sample 9494 enfiah leh niin heng atang hian hri kai mi 1846 hmuhchhuah leh niin hei hi Mizoram-ah ni khat-a hri kai hmuhchhuah an tam ber tum a ni leh a, Mizoram-a hri kai hmuhchhuah pawh mi sing kua aiin an tam ta a ni.

Niminpiah khan ZMC-a RT-PCR Laboratory-ah Aizawl District atanga Sample lak 2878 enfiah leh niin heng atang hian hri kai mi 473 hmuh leh an ni a, Salem Veng-ah hri kai 46 zet hmuhchhuah leh an ni a, hri kai mi 10 leh a aia tam hmuhna Veng leh khua 18 lai a awm bawk a ni. Aizawl District-ah hian Fluorescent Immunoassay Test hmangin Sample 179 enfiah ni bawkin hri kai mi 22 hmuh an ni bawk a, an zinga 20 te chu Aizawl khawpui chhung ami an ni bawk.

Mizoram District hrang hranga TrueNat Laboratory-ah niminpiah khan Sample 390 enfiah niin hri kai mi 80 hmuh an ni bawk a, an zinga 27 te chu Champhai District ami te niin Khawzawl District-ah pawh hri kai 20 hmuh an ni a, Kolasib District-ah 16, Lawngtlai District-ah 9, Lunglei District-ah 4 leh Aizawl leh Hnahthial District-ah hri kai mi pahnih ve ve hmuh an ni bawk.

Rapid Antigen Test hmangin niminpiah khan Sample 6047 enfiah leh ni bawkin hri kai mi 1271 zet hmuhchhuah an awm a, an zinga 585 te chu Aizawl District-a hri kai hmuhchhuah niin Siaha District-ah 348, Lunglei District-ah 115, Serchhip District-ah 75, Lawngtlai District-ah 56, Champhai District-ah 28, Hnahthial District-ah 27, Mamit District-ah 20, Kolasib District-ah 14, Saitual District-ah 2 leh Khawzawl District-ah hri kai mi pakhat hmuh an ni bawk.

Niminpiah khan Mizoram-ah COVID-19 hri kai mi 1481 te chu enkawl dam niin nimin khan tlai dar 5:00 thlengin hri kai mi 588 enkawl dam an ni leh bawk a. Heti hian nimin tlai dar 5:00 thleng khan Mizoram a hri kai hmuhchhuah chu 90,539 tling tawhin an zinga 74,982 te chu enkawl dam an ni tawh a. Hei hi hri kai hmuhchhuah atanga chhutin za zela 82.82 niin tunah hian hri kai enkawllai 15,254 an awm mek bawk. Nimin-a hri kai enkawllai awm zat hi Mizoram-a hri kai enkawllai an tam ber tum nia hriat a ni bawk a, Aizawl District chu hri kai enkawllai tamna ber niin hri kai enkawllai 10,796 an awm mek a, Siaha District-ah 1117 enkawl mek ni bawkin Khawzawl leh Saitual District tihloh District dang zawngah hri kai mi za aia tam enkawllai an awm a ni.

Mizoram-a hri kai enkawl zingah nimin zing dar 5:00 khan Chawnghmingthangi (84), Bazar Veng Lunglei chu boral lehin heti hian nimin thleng khan Mizoram-a hri kai zingah mi 303 an boral tawh bawk a, tuna thla kan hman mekah nitin hri kai boral an la awm ziah a ni.