RT-PCR Laboratory la din lohna District-ah din turin sawrkarin hma a la - Health Minister

Health Minister Dr. R. Lalthangliana chuan RT-PCR Laboratory la din lohna District dang zawngah din turin sawrkarin hma a la a, ruahmanna a siam tih a sawi.

Nimin khan Health Minister Dr. R. Lalthangliana hovin SAD Conference Hall-ah COVID-19 hri kai na zualte enkawlna tur, Intensive Care Unit (ICU) siam belh chungchanga hmalakna kal mek thlirho a ni a, he hunah hian Health Minister chuan RT-PCR Laboratory la din lohna District dang zawngah din turin sawrkarin hma a lak thu leh ruahmanna a siam thu hi sawiin, RT-PCR khawlte hi District dinhmun leh hmunhma te thlirin a tahtawlin bun a nih tur thu leh a tul ang ang bawhzui nghal char char a nih thu a sawi bawk.

He hunah hian Civil Hospital, Aizawl-a ICU ward siam meka thawk tur Nurse 25 sawrkar in a lak fel tak avangin Khum 10 chu hman nghal theih tura engkim peihfel tawh a nih thu tarlan a ni a, Khum 10 dang chu Oxygen Gas Pipline vuah fel a la ngai a, a siamtu company te nen indawr mek niin, reilote ah hman theih a nih beisei a ni bawk. Civil Hospital, Aizawl-a ICU Ward tharte hi a tul dan azirin COVID-19 hri kaite pawh enkawl theih tura tih a ni. Civil Hospital, Aizawl-ah hian Medical ICU khum 5 a awm mek a, tunah hian 25-ah tihpun a ni dawn ta a, reiloteah Pediatric ICU Khum 4 leh Obstetric ICU khum 4 awmna peihfel a ni dawn bawk a, heng zawng zawng peihfel a nih hunah chuan ICU khum 33 a awm tawh dawn a ni.

Dedicated COVID Hospital - Zoram Medical College-a ICU khum 34 awm mek bakah khum 20 dang dah belh tura hmalakna pawh tluang taka kalpui niin, ICU Ward thara thawk tur Nurse 50 sawrkarin a la mek a, reilote ah ICU hi hawn theih beisei a ni bawk tih tarlan a ni a, ICU Ward thara thawk tur Staff dang lak tawh sa te pawh training pek vek tawh niin, Ventilator rawn vuah tur Company Technician te chu naktuk (Zirtawpni) hian an rawn kal dawn a ni.

Hei bakah hian Civil Hospital, Lunglei-ah pawh a remchan dan ang angin ICU Ward chu emergency-a siam mek a nih thu tarlan a ni a. A rang thei ang bera hman theih tura theihtawp chhuah mek a nih thu tarlan a ni bawk. Nimin-a thutkhawm ah hian Health & Family Welfare Board Vice Chairman Dr. ZR Thiamsanga MLA bakah Health Department leh Finance Department hotute an tel a ni.