Latest News

Sa talhna hmun siamna atan Project siam a ni

AH&Vety Minister Dr. K. Beichhua chuan Slaughter House sakna tur Aizawl leh District dang 4 tan Project siam a nih thu a sawi.

Nimin-a Mualpui Salem leh Bawngkawn Brigade-a sa talhna hmun (Slaughter House) a tlawhna ah he thu hi sawiin AH&Vety Minister chuan COVID-19 hrileng avanga Project umzui kawngah harsatna an tawh dan leh New Delhi lamah hri a ziaawm hnuin project umzui mek a nih thu a sawi a. Sa (Meat)-ah Mizoram a intodelh theih nan hma lain, a bik takin Vawksa ah beiseina sang tak nen intodelh thuai tura hmalakna chak taka kalpui a nih laiin Vawk hri hlauhawm ber mai African Swine Fever in Mizoram a luhchilh tak avangin Vawk tam tak an thi a, tam tak suat an ni ta bawk chu a lungchhiatthlak hle a ni, a ti a. ASF vangin Vawk 27,704 an thih tawh bakah 13,000 chuang suat an ni tawh tih pawh sawiin, heng Vawk suat tak vulhtute tana zangnadawmna sumfai sawrkar laipui-ah dil mek a nih thu leh ASF avanga Vawk thi te pawh a vulhtuten zangnadawmna an hmuh ve theihna turin thuneitute hnenah dan anga ‘calamity’ a puang tura an ngen thu a sawi bawk.

AH&Vety Minister chuan tun dinhmun ah ASF avangin ram dang atanga Vawk lakluh a rem rihlo tih pawh he hunah hian sawiin, mithiam ten Vawk vulh a him tawk nia an hriat hunah vulh tan leh a rem chauh dawn tih a sawi a. AH & Vety Department chuan ram dang Vawk Farm thianghlim atanga lakluh dan leh a tul anga quarantine hnua mipui mimir vulh theih tura semchhuah dan tur ruahmanna te pawh ngaihvenin, a zirchiang chho zel  tih a sawi a, Mipuite chu sawrkar thu ngaichang turin a ngen bawk.

Rural Slaughter House Mualpui hi May 2017 atang khan mipuiin an hmang tan a, nitin Vawk 50 leh Bawng 50 talh theihna niin ran talh turte hi an hriselna endik hnuah talh thin an ni.

Comments

Chhiar Hlawhte