Latest News

Inkaihhruaina hman zui tur

Serchhip District Bawrhsap Kumar Abhishek chuan nimin khan thupek tichhuakin COVID-19 hri leng hluar zel laka mipuite him theihna tura tun thla ni 2-a inkaihhruaina thupek lo tihchhuah tawh chu Oct. 17, 2021 atanga Oct. 30, 2021 zanlai dar 12:00 thleng Serchhip District-ah hman chhunzawm tur a nih thu a tarlang.

Chanchin thar thenkhat :

CS hovin hmalakna thlirho

State Level Committee on Celebration of 75th Anniversary of India's Independence chu nimin khan Aizawl-a Chief Secretary Conference Hall-ah Chief Secretary Lalnunmawia Chuaungo hova thukhawmin India Zalenna champha vawi 75-na lawmna kal mek, Azadi Ka Amrit Mahotsav Mizoram sawrkarin a kalpui dan te an thlirho a. India zalenna kum 75-na lawmna hi kumin March thla khan rampumah hman tan niin Mizo-ram-ah chuan April 1, 2021 khan Chief Minister in Aizawl-a Vanapa Hall-ah a hawng a. Hemi ni atanga nimin thlengin Azadi Ka Amrit Mahotsav pual hian programme tum 12 neih tawh a ni a, nakum Independence Day thleng awh turin Prog-ramme 65 duan a ni.


RT-PCR YMA in ngaihtuah

Lunglei YMA Sub-Hqrs. Executive Committee nimin-a thukhawm chuan chhimbial mipuite tana Lunglei-a RT-PCR khawl bun a nih thuai theih nan sawrkarin hma a lakna chu chak zawka a kalpui theih nan a tul angin bawhzui nise an ti a. RT-PCR khawl hi Tourist Lodge, Zotlang-a dah turin ruahman a ni a, Tourist Lodge siam hna hi Vawiin atanga tan tura tih a nih avangin YMA Sub-Hqrs. chuan sawrkar hmalakna enpui turin SEC-in hnatlang neih nise an tih bakah RT-PCR khawl hi sawrkarin October thla chhung ngeia hman theih tura bun fel turin YMA Sub-Hqrs. Lunglei chuan a beiseiin a phut tlat tih an sawi a. Chhimbial mipuite mamawh RT-PCR khawl hi Lunglei-a bun fel a nih hma chuan YMA Sub-Hqrs. Lunglei chuan a enzui zel dawn tih an sawi bawk. 


X-Ray khawl pahnih dawng

Lunglei District Bawrhsap Kulothungan A, IAS hmalakna in Lunglei District chuan The Air Foundation, New Delhi atangin Portable X-ray Machine pahnih, a vaiin cheng nuai 3.30 hu chu dawngin nimin khan Lunglei DC chuan Lunglei CMO Dr. LC. Liana leh Medical Superintendent Dr. SR. Ngurchamliana te hnenah a hlan a ni.


Congress hunchhuah leh ring

Mizoram Pradesh Congress Committee (MP-CC) President Lal Thanhawla chuan nimin khan an party zawm thar te lawmluhna hun, Aizawl a Congress Bhavan-a neih ah Congress party chu midang te tana malsawmna ni thin Party a nih thu a sawi a. “Tunlaiin a tak tak hmuh tur awm lo leh tih si loh thusawi ngaihthlak tur tam lutuk chuan kan hnam nun nasa takin a ti buai a, hetiang thusawi ngaithlatu mipui rilru thianghlim tak pute beidawnna nasa takin a siam sak a ni,” a ti a, Pathian in Mizoram mipuite tan Congress Party hmanrua ah nasa takin a hmang thin tih sawiin, “A hun takah a remruatna fel tak avangin Mizoram mipuite tan Congress Party hi a hung chhuak leh ngei ang,” a ti bawk.


ZPM in mithar an lawmlut

ZPM Party chuan nimin khan Aizawl-a an party Conference Hall-ah mi thar lawm-luhna hun hmangin mithar 10 an lawmluh zingah Mizoram Chief Secretary pawh lo ni tawh, Haukhuma Hauzel, IAS (Rtd) chu a tel a ni. He huna mithar lawmluttu ZPM President, Lal-liansawta chuan an thawh chhuah pawh ni lo, mi rilru-ah ZPM a inpek duhna  thinlung lo piang thar zel chu mak an tiin an lawm em em tih a sawi a. Tuirial bial-a Assembly bye-election neih turah  Inthlanna thianghlim leh puitling an neih leh ngei a beisei thu sawiin, “Pathian leh mipuite duhsakna kan dawn leh ngei pawh ka ring a ni,” a ti bawk.


LADC-a EM atan mi 9 lalut

Lai Autonomous District Council (LADC)-a Executive Member atana ruat thar mi pakua (9) te chu nimin khan Lawngtlai Bawrhsap Dr. Andrew H. Vanlaldika chuan rinawmna thu tiam tirin a lalut a. LADC Executive Member tharte lakluh inkhawm hi LADC Hall-ah neih niin LADC-a Executive Secretary H. Lalramenga'n a kaihruai a, sawrkar notification a chhiarchhuah hnuah Lawngtlai DC chuan EM atana ruat thar mi pakua te hi thutiam tirin a lalut a, an Department chan tur pawh puan nghal a ni bawk.

Comments

Chhiar Hlawhte