Latest News

Mizoram-ah hri kai hmuhchhuah tam ber ni thleng

Mizoram-ah COVID-19 hri kai hmuhchhuah an la pung chak hle a, niminpiah khan Sample 9344 enfiah leh niin heng atang hian hri kai mi 1731 hmuhchhuah an ni a, Mizoram-ah ni khat-a hri kai hmuh tam ber ni niin Sample enfiah zawng zawng atanga za zela 18.53 te chuan hri an kai a ni.

Niminpiah khan ZMC-a RT-PCR Laboratory-ah Sample 2144 enfiah niin heng atang hian hri kai mi 457 hmuhchhuah an ni a, an vai hian Aizawl District-a Sample lak vek niin hri kai mi 10 leh a aia tam hmuhna Veng leh khua 16 lai la awmin a bak hi Veng leh khua 55 ami te an ni. Fluorescent Immunoassay Test hmanga Sample enfiah 131 atangin hri kai mi 22 hmuh an ni bawk a, an vai hian Aizawl khawpui chhung ami te vek an ni bawk.

Mizoram District hrang hranga TrueNat Laboratory-ah Sample 236 enfiah ni bawkin heng atang hian COVID-19 hri kai mi 26 hmuh an ni bawk a, Champhai District-ah hri kai mi 6 hmuh niin Lawngtlai District-ah 5, Serchhip leh Hnahthial District-ah 4 ve ve, Siaha District-ah mi 3 leh Aizawl leh Saitual District-ah hri kai mi 2 ve ve hmuh an ni bawk.

Heng bakah hian niminpiah khan Rapid Antigen Test hmangin Sample 6833 enfiah ni bawkin hri kai mi 1226 hmuhchhuah an ni a, an zinga 663 te chu Aizawl District-a hri kai hmuhchhuah te niin hri kai mi 10 leh a aia tam hmuhna Veng 22 zet an la awm a, a bak zawng hi Veng leh khua 74 ami te an ni. Siaha District-ah hri kai mi 111 hmuhchhuah awm bawkin Lawngtlai District-ah hri kai mi 104 hmuh an ni a, Lunglei District-ah hri kai mi 96 hmuh ni bawkin Champhai District-ah 90, Ser-chhip District-ah 58, Kolasib District-ah 48, Mamit District-ah 31, Hnahthial District-ah 13, Khawzawl District-ah 10 leh Saitual District-ah hri kai mi pahnih hmuh an ni bawk.

Mizoram-a COVID-19 hri kai te zingah nimin khan mi 847 te enkawl dam an ni ve leh thung a, heti hian nimin tlai thlenga Mizoram-a hri kai hmuhchhuah chu 81,460 tling tawhin hri kai zingah mi 66,904 te chu enkawl dam an ni ta a. Hei hi hri kai hmuhchhuah atanga chhutin za zela 82.13 niin tunah hian hri kai enkawllai 14,289 an la awm mek a ni.

Mizoram-a COVID-19 hri kai hmuhchhuah zingah nunna chan awm belh zelin nimin tlai thleng khan mi 268 zet an boral tawh a. Nizan hmasa dar 11:35 khan K. Lalrosanga (63), Bazar Veng Lunglei chu boralin nimin zing dar 5:55 khan Samsul (75), Ramhlun Venglai chu a boral ve leh a. Nimin zing dar 7:30 khan Holencha (25), Mualthuam chu Kawrtethawveng PHC panpui a nih laiin COVID-19 vanga boralin zing dar 9:50 khan Sangluaia (94), Zemabawk chu ZMC-ah a boral a, chawhnu dar 1:00 khan Zokhuma (82), Muanna Veng chu boral ve lehin tlai dar 3:25 khan Bobby Lalthanpuia (43), Lunglei Bazar Veng chu a boral ve leh bawk a ni.

Comments

Chhiar Hlawhte