Latest News

PMGSY hnuaia Green Technology hmanga kawng siam Deputy Speaker in a tlawh

PMGSY hnuaia Green Technology hmanga Kanghmun South leh Neihloh inkar kawng siam zawh tawh leh Sialsuk leh Sailam inkar kawng siam mek te chu nimin khan Assembly Deputy Speaker Er. Lalrinawma chuan tlawhin khawtlang mipuite nen heng kawng siam chungchanga inrawnkhawmna leh sawihona neih nghal a ni bawk.

Assembly Deputy Speaker hian Serchhip District chhunga Kanghmun South leh Neihloh khaw inkar kawng siam tawh chu tlawh hmasa in hemi hnu hian Neihloh Community Hall-ah kawng siam chungchanga inrawnkhawmna leh sawihona hi neih zui nghal a ni a, he hunah hian Deputy Speaker chuan khawvel sik leh sa danglam chuan nghawng a neih chhoh zel thu sawiin, khawlum avanga tunhma lama kan ram-a thlai tha theilo te pawh tunah chuan a that theih a nih tawh thu leh boruak lum in nghawng tam tak a neih tawh thu a sawi a. Hmasawnna hnathawh pawimawh tak takte ngei pawhin a lehlamah kan ramngaw, nungcha leh sik leh sa-ah te nghawng thalo a nei thei thin tih pawh sawiin, Green Technology in min tumpui ber chu chung hmasawnna hnathawhten kan sik leh sa leh nungchate a tlem thei ang bera a nghawng theih nana ruahmanna a nih thu leh kan mamawh em em thil a nih thu a sawi a. Chutiang dan hmanga hmalakna rah duhawm tak hmuh theiha kan nei ta chu a lawmawm hle tih sawiin, “A chhawrtu mipuite pawhin duat taka lo enkawl a, tlo taka lo hman tum tlat turin ka ngen che u a ni,” tiin kan ram leilung, nungcha, sik leh sa leh nihphungte hi duat taka an enkawla, kan venhim a tul takzet tih a sawi bawk.

He hun kaihruaitu PWE Chief Engineer (Roads) Er. Bowman chuan Central lama thuneitu ten PMGSY hnuaia Green Technology hmanga siam te chu India zalenna kum 75-na lawmna kal mek, Azadi Ka Amrit Mahotsav denchhena tlawha, a chhawrtu mipuite nena sawihona hunte pawh buatsaih tura ruahmanna an siam angin he hun hi buatsaih a nih thu a sawi a. Neihloh khua bakah hian Sailam khua-ah pawh hetiang hun hi nimin chawhnu lamah buatsaih a nih tur thu a sawi a. Tun thlengin Mizoram-ah PMGSY thawh khatna hmangin kawng hmun 351-ah KM 4482.732-a thui siam a nih thu leh a thawh hnihna-ah khaw kawng paruk, KM 194.250-a thui siam niin, a thawh thumna pawh hun rei vak lovah kalpui tan theih beisei a ni tih a sawi.

Nimin a he hun hmanna ah hian Er. Vanlalzuala Chenkual chuan Green Technology hmanga PMGSY kawng an laih dan sawifiahin, Green Technology Road Construction in a tum ber chu engmah chhuang khu lova kawng siam a ni ber thu leh leilung hausakna leh nungchate tichereu lo thei ang bera kawng laih leh siam te a ni, a ti a. Sawrkar laipui chuan kalphung thar duangin State sawrkar tin ten kumtin kawng an siam tur hmachhawp za zela sawm panga (15%) chu heng Green Technology hrang hrang- Cement Stabilization, Lime Stabilization, Cold Mix, Waste Plastics, Cell Filled Concrete, Paneled Cement Concrete Pavement, Fly ash leh a dangte hmang ngei turin a ti tih a sawi.

PMGSY hnuaia Mizoram-in a thawh-ah pawh Phase-VIII atang khan he technology hi hman a nih thu leh Mizoram-ah chuan heng Cell Filled Concrete, Cold Mix leh Paneled Cement Concrete te hi hman an nih thu a sawi bawk.

Nimin-a Deputy Speaker in a tlawh Kanghmun South - Neihloh hi KM 9.85-a thui niin cheng nuai 1610.25 senga thawh a ni a. Sialsuk - Sailam hi KM 10.5-a thui niin cheng nuai 770.76 senga thawh a ni thung. Heng kawng te hi Granular Sub Base (GSB) 125mm a chhah chunga 100mm Panelled Cement Concrete chhun an ni a. State chhunga he Green Technology hmanga PMGSY kawng siam tawh chin chu Cold Mix hmangin KM 83.46, Cell Filled Concrete hmangin KM 180.12 leh Paneled Cement Concrete hmangin KM 779.84-a thui te a ni.

Comments

Chhiar Hlawhte