Latest News

Principal Consultant, Aviation Wing chawlhtir turin ngen

Mizoram Pradesh Youth Congress Committee (MPYCC) chuan nimin khan Chief Minister hnenah Principal Consultant, Civil Aviation Wing, J. Lalhmingliana chawlhtir tura ngenna an thehlut. Chief Minister hnena lehkha an theh-luh ah hian MPYCC chuan J. Lalhmingliana hi January 23, 2019 khan kum hnih leh a chanve atan thla khata Rs. 30,000/- hlawh turin Principal Consultant, Civil Aviation Wing of GAD, Govt. of Mizoram atana ruat a ni tih tarlangin, Principal Secretary to Govt. tlukpui nihna pek a nih thu leh sawrkar hnathawk anga en niin, DFPR, 1978 hnuaiah Head of Department nihtir a ni tih an tarlang a.

Principal Consultant, Civil Aviation Wing, GAD hnuaiah hian sum hman dik lohna leh dan kalha hnathawh awm ngei nia kan hriat avangin MPYCC aiawhin MPYCC Treasurer leh General Secretary te hmingin April 16, 2019 khan Lokayukta Mizoram hnenah 'complaint' thehlutin hei hi Lokayukta chuan thutlingah ngaiin Anti-Corruption Bureau (ACB) chu Preliminary Enquiry nei tura tiin ACB hian chhuichianna Report pawh a thehlut tawh tih an sawi.

He thu kal zelah hian Lokayukta chuan Central Bureau of Investigation (CBI) chu chhui chiang tura kohluh ngai tiin New Delhi lamah thu a zuk thlen ta hial tih pawh MPYCC chuan sawiin, “Lokayukta-in CBI hial kohluh ngai a tih khawp nangma ruat 'Political Appointee' hi hum reng tum lova, Investigating Agencies-te kut phuar an nih loh nan dik leh zalen taka (Free and Fair Investigation) chhui a nih theih nan tuna a hna chelh hi chawlhsantir/bantir turin kan phut che a ni,” an ti a. “CBI kohluh a ngai ti a Lokayukta Mizoram hialin hma an lak lai hian CBI kolut theitu State sawrkar hian eng vanga hma la lo nge in nih tih hi kan zawt bawk che,” an ti a ni.

Comments

Chhiar Hlawhte