Serchhip District-ah COVID-19 hri kai mi 360 vel enkawl theihna awm mek

Tun dinhmunah Serchhip District-ah COVID-19 hri kai mi 360 vel enkawl theihna awm mekin In lama hri kai enkawllai thahnem tak an awm avangin hri kai enkawlna hmun indaihlo lutuk erawh a ni lo nia thudawn a ni.

Serchhip CMO Office atanga thu kan dawn danin Serchhip District-ah hian COVID-19 hri kai, taksa-a natna lanchhuahna nei te enkawl theihna tur Dedicated Covid Health Centre (DCHC) chu Serchhip District Hospital-ah siam niin hetah hian mi 10 enkawl theih tura ruahman niin khum a khat mek a, hei bakah hian hri kai te enkawlna tur hmun, Covid Care Centre (CCC) pahnih awmin Nursing School CCC ah mi 100 awm thei-ah 78 awm mekin Integrated AYUSH Hospital, Thenzawl-ah mi 38 awm theihna ah a awm thei zat aia tam mi 50 an awm mek a, CCC-a mi 138 awm theihna CCC-ah 128 an awm mek a ni.

Heng bakah hian Vantlang in an enkawl COVID-19 hri kai te enkawlna, Community Covid Care Centre (4C) pawh 11 awm mekin heng ah hian mi 209 enkawl theih an ni a, Marian H/S Serchhip 4C-ah mi 60 awm theihna mi 10 awm mekin; UPC Sunday School Hall Serchhip-ah mi 20 awm theiin mi 8 an awm mek a; Handloom Complex Thenzawl-ah mi 20 awm theiin mi 18 an awm mek a. Mi 25 awm theihna BRC East Lungdar-ah mi 3 awm mekin; Middle School-I East Lungdar-a mi 18 awm theihna ah mi pakhat a awm mek bawk. KVK Farmer Hostel, North Vanlaiphai-ah mi 25 awm theiin mi pakhat enkawl mek a ni a; Primary School-I Chhingchhip-ah mi 13 awm theiin mi 13 an awm mek a, Govt. Central ME School Chhingchhip-ah mi 13 awm thei tura ngaih a nih laiin 22 a awm mek a. Keitum-ah 4C pahnih siam niin mi 83 an awm mek a, Govt. H/S Lungpho-a 4C erawh a awm thei zat hriat ni lovin tunah hian mi pakhat dah mek a ni thung a, mi 10 vel chu awm thei tura ngaih a ni a. Heti hian heng 4C 11-ah hian mi 200 chuang enkawl theih tura ruahman niin mi 160 enkawl mek an ni.

Serchhip CMO Office-a thawktute chuan tun dinhmun ah Serchhip-a Covid hri kai te enkawlna hmun chu khat rih mah se hri kai zingah In lama enkawl thahnem tak an awm avangin hri kai enkawlna indaihlohna erawh a awmlo tih an sawi a. Tun dinhmun ah hri kai In lama enkawl hi mi 249 lai an awm mek a ni.