Latest News

Mizoram-ah Delta Plus Variant a awm tih finfiah

Mizoram-ah COVID-19 Delta Plus Variant a awm tih finfiah a ni tawh.

Official Spokesperson on COVID-19 leh State Nodal Officer Dr. Pachuau Lalmalsawma chuan tunhnaia RT-PCR Positive sample 350 te Whole Genome Sequencing tura an thawn zingah COVID-19 hrik chhuak thar hi hmuh a nih thu a sawi a. National Institute of Biomedical Genomics (NIBMG), Kalyani, West Bengal-ah August thla khan heng sample 350 te hi thawn a nih thu leh hrik thar hmuhchhuah zingah hian Mizoram-ah a awm tih la finfiah loh Delta Plus Variant 3 a tel thu sawiin, heng Variant te hi Champhai District-a mi 2 leh Kolasib District-a mi pakhat an ni a, Delta Plus variant hi tunlaia kan hriat lar hri inkaichhawn awlsam tak, Delta Variant aiin za-a 60 (60%) in inkaichhawn a awlsam lehzual tih a sawi.

Sample thawn zinga 70-ah Delta Variant chhungkaw zinga mi, Delta Lineages an tih mai, mithiam ten an zirchian mek leh a hming an la phuah loh hmuh tel a ni a, Delta variant pangngai hi sample 213-ah hmuh niin, heng sample te hi Aizawl, Lunglei, Kolasib, Champhai leh Serchhip District atanga sample lak zinga mi an ni a. Mizoram atanga RT-PCR Sample endik tura phai lama thawn tawhte atangin COVID-19 hrik thar 510 hmuh a nih tawh thu a sawi bawk.

Comments

Popular News (Last 30 Days)