Latest News

Health Minister in ZMC-ah Oxygen Plant a hawng


 Mizoram sawrkar in PM-CARES hnuaia 300 LPM Oxygen Plant a dawn SRHF-ZMC a bun chu nimin khan Health Minister Dr. R. Lalthangliana chuan a hawng.

    Oxygen Plant hawn puala inkhawm ah Health Minister Dr. R. Lalthangliana chuan ZMC in Oxygen Plant 200 LPM an neih sa tangkai taka kan hman laiin a aia lian zawk PM-CARES hnuaiah 300 LPM kan dawng leh hman theih tura hawn a ni ta chu a lawmawm takzet tih a sawi a. COVID-19 hripui leng karah he hri kai damlo na zual ten Oxygen an mamawhna a san belh nasa em em a, a hun takah Pathian remruatin kan mamawh phuhruk a ni, a ti a. Tunah hian PM-CARES hnuaia kan dawn tho CPWD in an rawn bun 1000 LPM pawh reilote ah kan hawng thei tawh dawn tih sawiin, Oxygen chungchang ah a thlamuanthlak a ni, a ti.
    Health Minister chuan Mizoram District Hospital zawng zawngah Oxygen Plant hi dah tura ruahman a nih thu pawh he hunah hian sawiin, tunah hian Kolasib-a mi tur 250 LPM leh Mamit-a mi tur 500 LPM pawh Lengpui Airport-ah a rawn thleng tawh a, a khawl a rih tham deuh avangin Crane hmanga laksawn a ngai a, an ngen angin ISPAT Company ten hma an laksak dawn thu a sawi a. Synod Hospital, Durtlang leh Christian Hospital, Serkawna mi tur pawh CSR kaltlanga hmuh theih dan tur an dap mek thu a sawi bawk.
    Health Minister in a hawn tak Oxygen Plant 300 LPM hi PM-CARES Fund (Citizen Assistance and Relief in Emergency Situation) atangin COVID-19 Second Wave dona atan June 18, 2021 khan Ministry of Health & Family Welfare atangin dawn a ni a. A khawl dahna tur In hi Mizoram sawrkar sak tura tih niin cheng nuai 21 sengin kar 3 chhunga sak zawh a ni a. Oxygen Plant hi Central Medical Services Society in a thlawnin an rawn bun a, July thla khan an Engineer te lo kal in July 27, 2021 khan an rawn bun fel a ni.
    He khawl hi Absstem Technologies, New Delhi te siam niin minute khata Oxygen a pek chhuah theih zat hi 300 litres niin darkar 24 chhungin 4,32,000 litres a pechhuak thei a. A sample hi Quality Assessment Lab. FARELABS, Gurgaon-ah August 24, 2021 khan thawn niin, a thianghlim zawng hi 94.13% tih hmuh a ni. Pressure hi 4.5 bar thleng a pe chhuak thei a, chumi chuan pipeline ah kal tirin damlo ten an mamawh angin an khumah an lo la thei dawn a ni.
    Tun dinhmunah ZMC-in nikhata Oxygen a mamawh zat hi litre nuai 12-13 vel a ni a, khawl neihsa 200 LPM hian nikhatah litre nuai 3 vel a pechhuak ve a, a bak zawng hi chu nitin lei niin Oxygen man ah nitin Rs. 45,000 vel hman a ni a, thla khatah Rs. 13,50,000 vel sen a ni.

Comments

Chhiar Hlawhte