Oct. 30-ah Tuirial bial bye-election nei tur niin Political party te an inbuatsaih mek

Bialtu MLA a boral avanga Assembly bial ruak-a puan tak 4-Tuirial (ST) A/C-ah October 30, 2021 khian MLA thlangin mipui ten Vote an thlak dawn a, he inthlanna a Vote tla te chu November 2-ah chhiar nghal tur a ni ang.

Election Commission of India chuan ramchhung State leh UT 3-a Parliamentary Constituency pathum leh State leh UT 14-a Assembly Constituency 30-a bye-election neih hun tur hi nimin khan a puang a, heng inthlanna neih tur zingah hian Mizoram atangin 4-Tuirial (ST) A/C pawh telin Tuirial bial-a Assembly bye-election neih tur atan hian thla thar October 1, 2021 khian hriattirna tihchhuah a ni anga, inthlanna hun tumte tan hming pekluhna hun hawng nghalin October 8, 2021 thlengin hming pekluh theih a ni dawn a ni. Inthlanna chuh tura Nomination Paper thehluh te chu October 11, 2021-ah enfiah a ni anga, inhnukdawk duhte tan Oct. 13, 2021 thleng hun hawngin October 30, 2021 (Inrinni)-ah mipui ten Vote an thlak anga, Vote tle te hi Nov. 2-ah chhiarin inthlanna hi Nov. 5, 2021-ah chuan zofel vek tura ruahman a ni.

He inthlanna neih turah hian Vote thlakna khawl, EVM leh VVPAT te hman tur a ni dawn a, inthlanna neih hun tur puan a nih rual hian inthlanna neihna tur bial-ah hian Election Model Code of Conducts chu kenkawh nghal tur niin inkaihhruaina hrang hrang pawh Election Commission of India chuan a tichhuak nghal bawk a ni. 4-Tuirial (ST) A/S-ah hian Vote nei mi 17,905 an awm a, heng zinga 8,818 chu mipa niin midang 9,087 chu hmeichhia an ni a, Mipa aiin hmeichhia Vote nei hi 269-in an tam zawk a, Vote thlakna hmun Polling Station 26 a awm a ni.

He inthlan neih tur atan hian rorellai Mizo National Front (MNF) Party chuan an party candidate atan MIZOFED Chairman nilai K. Laldawngliana, Aizawl Dinthar Veng an ruat tawh a. MPCC pawhin an Candidate atan MLA hlui Chalrosanga Ralte an ruat thu leh hei hi an Party President pawhin a pawmpui tawh thu an party thupuangtu chuan a lo sawi tawh a, inthlanna chuh tua ngaih ZPM Party erawh in an Candidate la puang lovin hetianga inthlan hun puan a nih tak avang hian an candidate tur hi an puan thuai rin a ni a. Party dang zingah Candidate neih tur leh neihloh tur puang an la awmlo thung a ni.