COVID-19 hri leng chungchangah State Level Expert Team on Covid-19 Management din a ni

Mizoram chhunga COVID-19 hri kaite enkawl dan tur leh kawng hrang hranga mawhphur bik tur, mithiam rual awmna State Level Expert Team on Covid-19 Management din a ni a. Health Minister chuan tunlai-a hri kai hmuhchhuah a tam chhan chu hri kai hnimhnaite chhui a nasat vang niin a sawi.

Health Minister Dr. R. Lalthangliana sawi danin State Level Expert Team on COVID-19 Management-ah hian Convener leh Member Secretary bakah Member 12 awmin Ningani khan hriattirna chhuah a ni a. Health and Family Welfare Department Principal Director kaihhruai he Team hian Mizoram chhunga COVID-19 vei leh vei lo endik chungchang leh damlote enkawl chungchanga SOP-te an enfiah anga, hri leng dinhmun leh buaipui a nih dan zirchiang reng turin an thukhawm deuh reng ang a, zirchianna leh rawtna chu sawrkarah a thehlut thin dawn a. He Team-ah hian sawrkar hnuaia thawk mek Doctor-te bakah chawl tawhte, Microbiologist leh thiamna bik neite IMA aiawhte an tel a ni.

Health Minister Dr. R. Lalthangliana chuan tunlai a hri kai hmuhchhuah a tam chhan chu State danga an tih ve loh, hri kai hnimhnaite chhui a nasat vang niin a sawi a, hri kai hnimhnaite hi kai ve ngei tura ngaihte an lo nih bawk avangin hri kai hmuhchhuah a tam a ni, a ti a. Endik runpui pawh hri kai tamna veng leh khua a kalpui a nih avangin hmuhchhuah a tam a ni, a ti bawk.

Hri dona kawngah mithiamte rawn chunga sawrkar a kal thu sawiin Health Minister chuan, mimal emaw sawrkar emaw chauhvin thutlukna siam lovin zau taka inrawn hnu-a thutlukna siam a nih thin thu a sawi a. Mithiam rualte bakah Political Party aiawhte, tlawmngai pawl te leh Kohhran aiawhte nen thukhawma thutlukna siam thin a nih thu a sawi bawk.

Lunglei lamah COVID-19 hri kai enkawlna tur ruahman a nih thu leh Lunglei Civil Hospital-ah pawh COVID-19 vei na zualte enkawlna tur bik ICU khum engemawzat siam belh tur a nih thu Minister chuan a sawi a. Hei hi hmanhmawh taka siam tura Department hotute a hriattir tawh thu sawiin, Lunglei Civil Hospital chhawng chung ber chu ruahman tum a nih thu a sawi bawk.