Latest News

MIGAHTA in Minister hnenah Ambulance 2 an hlan

Mizoram Govt. Adhoc Aided High School Teachers Association (MIGAHTA) hruaitute chuan nimin khan School Education Minister Lalchhandama Ralte hnenah a tulna hmun apianga hman turin Ambulance pahnih an hlan.


MIGAHTA in Ambulance an hlanna hun hi Education Minister chenna In-ah neiin School Education Minister chuan Zoram in hripui leng avanga hun khirh tak a tawn laia zirtirtu pawl hrang hrangte inpekna chu lawmawm a tih thu a sawi a. Zirtirtute chu ram leh hnam dintu an nih avangin Mizoram in hun thim a tawn lai pawha beiseina êng min pe theitu an ni a, zirna chu ram hnuk pawimawh ber a nih avangin hrileng karah pawh zirna chu a chawl ve thiang lo a ni, a ti. Minister chuan zirna tih hmasawnna turin Chief Minister Zoramthanga hovin theihtawpa hmalak a nih thu pawh sawiin, hun hmasa lam ngaihtuah chuan Mizoram zirna in hmel thar tam tak a hmu tawh tih a sawi a. Chutih rualin hrileng avanga sawrkar sum leh pai dinhmun a tlakhniam nasat avangin sawrkarin zirna chungchanga hmachhawp tam tak a neihte a tihlawhtling nghal theilo a nih pawhin dawhthei taka lo nghak turin zirtirtu pawl hruaitute a ngen a ni.

He hunah hian MIGAHTA President David LC. Chhakchhuak chuan hripui lengkarah pawh zirna a thuanawp mai lohna tura Education Minister hmalakna chu an pawl chuan chhuanawm an tih thu leh an thlawp tlat zel dawn thu a sawi a. Hrileng karah pawh sawrkar ruahmanna angin zirtirtute chuan naupang zirtirna an kalpui reng thu te, hri len tirh atanga Vawiin thlengin ram leh khawtlang himna tura zirtirtuten nasa taka an beih thute a sawi bawk.

Mizoram Govt. Adhoc Aided High School hi Mizoram pumah 129 awmin, School tinah Headmaster pakhat, Teacher 5 leh IV Grade pakhat awmin, Mizoram pumah thawktu 903 an awm mek a. MIG-AHTA hian hripui leng dona atan kum 2020 khan an nikhat hlawh thawh tawhin, kum 2021 hian an hlawh thawhkhawm Rs. 19,02,970/- chu hripui dona atan sawrkarin a tul anga a hman atan an hlan leh a ni.

Comments

Chhiar Hlawhte