Latest News

Naupang leh thalai ten taksa an sawizawia rilru an senna tur ngaihtuahpui a tul - DIPRO, Serchhip

Serchhip District Information & Public Relation Officer, K. Saitluanga chuan COVID-19 hri leng avanga inkhuahkhirhna te kalpui mek a nih avangin naupang leh thalai ten an taksa an sawizawi a, an rilru an senna tur ngaihtuahpui chu thil tul leh pawimawh tak a nih thu a sawi.


All Mizoram Karate Association (AMKA) Serchhip District in Karate zirna, Dojo an hawnna hun nimin-a Serchhip District Sports Committee (SDSC) Office-a neih khuallian nia a hmanpuina ah he thu hi sawiin Serchhip DIPRO chuan hripui leng mek avanga inkhuahkhirhna kan kalpui mekah infiamna hmun te khara zirna In te pawh hawn a nih rih loh avangin thalai leh naupang ten tunlai khawvel thiamna bungrua- TV leh Mobile Phone te an hmang nasa hle tih a sawi a, hei vang hian an taksa an sawizawia an rilru an senna tur ngaihtuahpui chu thil tul leh pawimawh tak anih thu a sawi a, hei bakah hian naupang te rilru ah intihsiakna thinlung tuh a pawimawh thu sawi bawkin, chutiang kawnga an kal theihna tura All Mizoram Karate Association (AMKA) Serchhip District hmalakna a Dojo hawn a ni thei chu lawmawm a tih thu a sawi bawk.

Serchhip DIPRO chuan Karate zirtirtu ten sum leh pai-a hlawkna um lova Karate hmangaihna avang zawka an penchhuak chu fakawm a tih thu pawh sawiin, Olympic Item pakhat ah Karate chu telh anih tawh avangin Olympian nih theihna hun tha tak zirlai ten an neih thu a sawi a, “Thil tha tak takin a hmuak che u a ni. Khawtlang tan leh a tui mite tana malsawmna a nih ka beisei a a ni,” tiin hri leng laka himna tura sawrkar in inkaihhruaina a siam te tha taka he Dojo hi kalpui turin a chah bawk a ni.

Nimin-a AMKA Serchhip District Dojo hawnna hun hi an President H. Sanghmingliana chuan kaihruaiin an pawl Secretary, Zomalsawma chuan an pawl hmalakna leh an hlawhtlinna hrang hrangte a tarlang a, an pawl Adviser C. Ramengmawia chuan lawmthu sawina hun a hmang bawk a ni.

AMKA Serchhip District Dojo hawn takah hian mi 21 ten Karate hi zir tura beisei niin zing leh tlai tin Instructor mi 4 ten an zirtir dawn a, Karate zirna hi Serchhip Bazar leh New Serchhip ah neih tura ruahman a ni bawk.

Comments

Chhiar Hlawhte