MNF in Politics khelh nana hripui hmang chhen lo turin MPCC te an duh thu an sawi

MNF Party chuan Congress Party chu politics khelh nana hripui hmang chhen lo tura an duh thu sawiin, hripui chu kan zavaia tangruala do tlan chi a ni tih an sawi.

Inrinni-a thuchhuah an siamah MNF chuan Mizoram Pradesh Congress Committee (MPCC) in Health Minister Dr. R. Lalthangliana leh MOT Chairman Dr. ZR.Thiamsanga te hripui do kawnga hlawhchham leh bang tura an duhthu an sawi chu hri chungchang ah mimal anga indem chi a ni lo tih an sawi a. Health Minister leh MOT Chairman hian hripui lo luh hma atang tawhin a lo inven lawk dan turte ngaihtuahin theihtawpin hma an la bang lova. Hripuiin min luhchilh tak tak hnuah pawh chawl hman lovin an la buai em em reng niin an sawi a. “Chief Minister, Minister, MLA, Kohhran, NGO, sawrkar leh mimal pawhin hripui dona kawngah tha an thawh nasa em em vek a. Mizo mipuiten hripui hi kan vaiin kan ning tawh a, hri hi tawp tawh se kan duh vek a, a dona kawngah kan tangrual tha em em bawk. Hripui leng tawp thei mai lo hi hreawm kan ti vek a ni,” an ti.

MNF chuan MPCC-ten Health Minister leh MOT Chairman mimal thlurbinga an mawhphurhna bik anga puha demin bang tura an lo nawr chu Politics-a inerna leh initsikna vang chauhah an ngai tih an sawi a, “Covid do danah Health Minister Dr. R. Lalthangliana leh MOT Chairman Dr.ZR.Thiamsanga te pahnih emaw mimal ngaihdana hma la mai thin an ni lo a, Kohhran zawng zawng aiawh, NGO pawl hrang hrang aiawh, Local Council zawng zawng aiawh, khawpui enkawltu AMC aiawh, covid donaa pawimawhna nei sawrkar department-te aiawh leh Minister dang dang te nen inkokhawmin an thlirho thin a, ngaihdan leh tha tura ngaihte sawihoin, hmalak zel dan turah rorel thutlukna an nei thin a, political party zawng zawng aiawh koh tel chang pawh a awm thin. Chumia an rorel thutlukna dungzuiin hmalak a ni ta thin a, chuvangin demna thu an sawi dawn a nih chuan mi pahnih chauh thlurbinga dem ngawt chi an ni lo,” an ti a. Khawvel ram dang leh India ramah pawh Covid do kawngah thawktute eptu party-ten bang tura an lo nawr ve sekna hmun a awm ve lo nia sawiin, “Congress party hian hripui hi politics khelh nan lo hmang ve chhen tawh lo se, kan zavaiin tangruala do tlang turin MNF chuan a sawm zawk a ni,” an ti bawk.