Aizawl-ah World Tourism Day 2021 hman a ni

Nimin Sept. 27, 2021 khan ‘World Tourism Day 2021’ hman niin he ni puala Tourism Department in Aizawl Vanapa Hall-a hun an hman chu Tourism Minister Robert Romawia Royte chuan a hmanpui a. He hunah hian ‘Ek Bharat Shreshta Bharat programme’ pawh hman nghal a ni bawk.

World Tourism Day 2021 puala hun hman ah hian Tourism Minister chuan Covid hripui avangin mimal, chhungkua, pawl leh Kohhran ten harsatna kan tawk nasa tih sawiin, khawvel pumah hripui avanga tuar nasa chu Tourism leh a behchhan Industry te an nih thu sawiin, Mizoram ngei pawh Tourism Sector behchhana eizawngte an mangangin an tuar hle tih a sawi.

Tourism hmasawnna chungchang sawiin Minister chuan Tourism lamah hma kan sawn theih nan Sawrkar a pawimawh ang bawkin Private players te an pawimawh tih a sawi a, inpeizawn chunga kan kal chuan nasa takin tourism thanna tur a thleng thei dawn a ni, tiin Tourism hmasawnna hi kan vai atan anih angin theihtawpa inchawi kang tawn zel tur kan nih thu a sawi bawk.

Kumin-a World Tourism Day-ah hian ‘Tourism for Inclusive Growth’ tih chu thupui-ah hman niin Dr. R. Lalrinchhani, Deputy Diretor chuan thupui sawizauna hun hmangin Covid hripuiin khawvel pumah Tourism Industry a nghawng dan te a sawi bawk.

World Tourism Day hman rual hian ‘Ek Bharat Shreshtha Bharat’ hman nghal niin hei hi Sawrkar Laipui-a Ministry of Human Resources Development in kum 2015 atanga an lo kalpui, India a cheng hnam hrang hrang leh State hrang hrang inkara inunauna leh inlaichinna tha siam nana programme an duan a ni a, Ek Bharat Shreshtha Bharat atana Sawrkar laipuiin Partner States atana a ruat Bihar leh Tripura te atangin Cultural Performance hmuhnawm tak thlirho a ni bawk.

Nimin-a he hun hmanna ah hian Minister hian Thenzawl Golf Resort Portal (website) pawh mipui hman theih atan a tlangzarh bawk.