Chanchin thar thenkhat :

Oct-ah Scho sem beisei

Mizoram Scholarship Board hotute chuan October thla tir lamah chuan Post-Matric Scholarship pekchhuah theih an beisei tih an sawi. Mizoram Scholarship Board Secretary Dr. PL. Ramliana chuan zirlai ten Scholarship an dawn tlai chhan chu sawrkar laipui Ministry of Tribal Affairs in tihdan thar an hman vang niin a sawi a, “Central in system thar a siam ‘New Procedure for Release of Fund’ an hman vang a ni a. System thar hi kan buaipui zo tawh a, mahse tih ngai neuh neuh a la awm avangin tun thla chhung hi chuan kan sem hman ang em aw kan ti a. Harsatna dang a awm loh chuan October-ah chuan pek-chhuah theih kan in beisei a, keini lam chu kan inpeih tawh a ni,” a ti bawk.

Khawzawl DC in tlawh

Khawzawl District Bawrhsap C.C. Lalchhuang-kima chuan Inrinni khan Khawzawl Dinthar Veng a Khawzawl District DC Office Complex sak mek chu a tlawh a, hna thawktu Contractor-te chu hunbi tiam chhunga hna zo hman tur leh, hna tha leh tlo, khawtlang leh ram tana rotling leh chhinchhiah tlak tak sa puitling turin a chah bawk. Khawzawl District DC Office Complex hi cheng nuai 1000 senga sak mek niin a dung ft. 147 leh a vang ft. 47 in chhawng li a sak tur a ni a, a chhawng hnuai pahnih te chu nakum kumtawp lamah chuan luah theih beisei a ni. Khawzawl DC hian Project Director, DRDA Office tur leh Pressure Swing Adsorption Plant (Oxygen Plant) hun mek bakah CMO Office hmun turte pawh a tlawh nghal bawk.

Tuichang lui-ah zuangthla

Nimin chawhma dar 11:00 vel khan Rosangliana (41), Hnahthial Venglai chu Hnahthial leh Tarpho inkar Tuichang lei atangin a zuang-thla a, mi tlawmngai ten a zawn hna thawkin he thu buatsaih lai thleng hian hmuh ala ni lo. Thu-dawn danin Rothangliana hi tunhma lamah pawh rilru lamah harsatna (mental illness) a lo nei tawh thin a, amah hi Hnahthial Post Office-ah Dak Runner hnathawk lai a ni.

PC Party in tanpuina hlan

Inrinni khan PC Party hruaitute chuan PC Party Founder President Brig.T.Sailo hmingin Myan-mar atanga Mizoram-a raltlan te tanpuina atan cheng nuai khat leh thilpek chi hrang hrang chu Thingsai Raltlan Committee te kutah an hlan a. PC Party President Lalhmangaiha Sailo chuan Myanmar tualchhung buaina avanga kan Unau Zohnahthlak kut benga vakvaite chu an Party chuan an lainat takzet tih sawiin, heng mite khawngaih leh lainat taka lo dawngsawnga lo tuamhlawmtu zawng zawngte chungah lawmthu a sawi bawk. Heng an thilpek te hi PC Party-a General Secretary VL. Thazova leh hruaitu dang ten Thingsai khua ah an hlan a ni.

Sawrkar hlawhchham ah ngai

ZPM Party-a General Secretary Phairo-thanga chuan MNF sawrkar chu kum 3 chhung hian a hlawhchham hle tih ZPM Aizawl East-II Block intuaitharna Inrinni kalta-a Lengte-a neih ah a sawi a, “Ei leh bar a intodelhna kawng ah te, an Flagship programe SEDP ah te, thalai te hmasawnna kawngah te an mualpho zel a. Congress sawrkar sum hman bang hmanga kawng an siam pawh a chhe zo leh tep tawh bawk a, puhmawh tur an zawng mai mai a ni,” a ti. Hei bakah hian Congress party chuan mipui ngaih-ven an hlawh tawh lo hle nia sawiin, “2023-ah hian ZPM sawrkar a pian ngei a rinawm hle a ni,” a ti bawk.

MRB te khar a ni dawn

Vawiin Sept. 27, 2021 hian India rampum a Regional Rural Bank 43-te chuan nawrh an tum a, Mizoram Rural Bank pawhin zawm ve in Bank an hawng dawn lo a ni. He an nawrh chhan tur zingah sawrkar in share za a sawmnga (50%) a neih Sponsor Bank kuta hlan an duh loh vang te, Regional Rural Bank te inzawmkhawma National Rural Bank of India (NRBI) din an phut vang te, thawktu nghet lo ten Minimum Wages ang tala hlawh pek ve an phut leh Bi-Pertite Settlement a nihna ang taka kalpui an phutna te a tel thu an sawi bawk.