Rampum-a insumdawntawnna Hapta hman mek ‘Vanijya Saptah’ hawnna Mizoram-ah neih a ni

September 20, 2021 atanga September 26, 2021 chhunga rampuma insumdawntawnna (commerce) Hapta ‘Vanijya Saptah’ hman mek chu nimin khan Mizoram-ah pawh a hawnna neih niin Ports, Shipping and Waterways changtu Union Minister Sarbananda Sonowal chuan he Hapta hi a hawng a ni.

Aijal Club-a he Hapta hawnna hun ah hian Video Conference kaltlanga thu sawiin khuallian Union Minister Sarbananda Sonowal chuan India thil siam ramdanga hralhchhuah (export) lamah beihpui thlak mek a ni tih sawiin, kumin sawrkar kum chhung ngei hian US Dollar maktaduai 400 hu export tum a ni, a ti a. Hmarchhak State, a bik takin Mizoram chu foreign ram pahnih karcheh-a awm a nih avangin he hmalakna ah hian a pawimawh hle dawn tih pawh sawiin, an hmaa chona lian tak awm chu hlenchhuah tum theuh turin mipuite a sawm a ni.

He hunah hian khual zahawm Mizoram Commerce and Industries Minister Dr. R. Lalthangliana pawhin Sawrkar Laipui Ministry of Commerce leh Federation of Indian Export Organisation te chungah lawmthu sawiin, Mizoram pawhin he hmalakna hi a chhawr tangkai ve ngei a beisei thu a sawi a. Mizoram dinhmun tlangpui sawifiahin, Mizoram Economy 60% chu Lo neih leh thlai tharah a innghat a, State GDP pawh 66.14% chu Agriculture leh a kaihhnawih hian a hauh a ni, a ti. Chemical an hman tlem avangin Mizoram tharchhuah te chu a hriselin a rintlak a, amaherawh chu, investment lamah harsatna a awm thin avangin hralhchhuah kawngah harsatna an tawk tih a sawi.

Commerce and Industries Minister chuan Bangladesh leh Myanmar ramri-a Land Custom Station kaltlanga insumdawn tawnna chungchang pawh sawiin, ramri-a sumdawnna in hma a sawn zel theihna turin State Sawrkar chuan India-Bangladesh inrina ah Border Haat 4 leh India-Myanmar inrina ah Border Haat dang 4 sakna tur sawrkar laipuiah rawtna a thlen tawh thu a sawi a, Chittagong Port chhawr tangkaia International Market lian zawka luh theih beiseina an neih thu a sawi bawk. Dr R.Lalthangliana chuan Kaldan Multi Modal Transit Transport Project leh Land Custom Station Zorinpui puitlin hun an nghahhlelh thu sawiin, hemi kaltlang hian Myanmar Sitwe Port nen inkalpawhin International Market mai bakah India ram khawpui dangte pawh Lawng hmanga kalpawh theihna kawng a inhawng dawn a ni, a ti a. Foreign ramte nen hlawk zawka insumdawntawnna kalpui a nih theih nan hmasawnna ruhrel pawimawh din te, kawng siam leh a awmsa chei that te, lui hmanga inkalpawhna tur Riverine Route siam te chu ngaihpawimawh ni se, a ti a. Mizoram pawhin thawnchhuah (export) tur a neih theih nan industry hmasawnna ngaihtuah leh he insumdawntawnna atanga State chhung mipuiten hlawkna tam tak an lo tel theihna tura hmalak chu ngaihpawimawh hmasak ber tur nia a hriat thu pawh a sawi bawk.