Chanchin thar thenkhat :

Mizoram-ah I-Lab bun dawn

Mizoram Rajya Sabha MP K. Vanlalvena leh OSD to Chief Minister Rosangzuala te chuan nimin khan Ministry of Science & Technology hnuaia Department of Biotechnology-a Secretary Dr. Renu Swarup chu a Office-ah hmuin natna hrik enfiahna, Infectious Disease Diagnostic Laboratory (I-Lab) Mizoram a bunna tur chung-changa hmalakna an sawipui a. Renu-i chuan sum harsatna karah Union Minister of State for Science & Technology Dr.Jitender Singh hnena Mizoram Chief Minister ngenna ngai pawi-mawhin Department of Biotechnology chuan Mizoram tan I-Lab pakhat a rawn bun sak thuai dawn tih sawiin, chawlhkar 4 chhunga tihfel a nih tur thu a lo hrilh a. I-Lab hi Vishakapatnam ah buatsaih mek a ni tih sawiin, a hun takah Mizo-ram a thlen theih na tura thil pawimawh te lo enzui tur leh a tul anga IBSD Imphal te nen inrawn chunga ruahmanna lo siam turin Department of Biotechnology Official pahnih chu hemi atan hian ruat an ni tih a lo hrilh bawk a ni.

RT-PCR khawl bun dawn

Champhai District Hospital-a RT-PCR khawl bun tur chu nimin khan Champhai District-a MLA 3- TJ. Lalnuntluanga, Dr. ZR. Thiamsanga leh Ramthanmawia te chuan ZMC atangin an lachhuak a, he khawl hi UNICEF atanga Mizo-ram in a dawn nia tarlan a ni. Hemi hmalam hian Health Minister Dr. R. Lalthangliana hovin a Pisa ah Health Department hotute nen RT-PCR khawl bun dan tur hi sawiho a nih tawh bakah he khawl hi rang taka bun a nih theih dan tur chu Chief Minister an lo sawipui tawh bawk a ni.

CMRF-ah sum luh belh zel

COVID-19 ah hrileng avanga harsatna tawk te puihna turin nimin thleng khan mi tlawmngai ten Chief Minister's Relief Fund for COVID-19 sum la chhunglutin nimin thlenga sum lut chu Rs. 31,11,37,178/- a tling tawh a, heta tang hian Rs. 29,70,30,470/- hman ni tawhin tunah hian Rs. 1,41,06,708 a la awm mek a ni.

Coaching Centre sawidun

Mizoram Youth Commission Chairman Dr. Vanlaltanpuia MLA leh Champhai North bialtu MLA Dr. ZR. Thiamsanga te chu nimin khan MYC Chairman Pisa-ah inkawmin Dr. ZR. Thiamsanga chuan Champhai District leh a chhehvela thalaite tan thiamna kawnga hma an sawnna tur leh eizawnna an dap kawnga an chhawr tangkai theih nan Coaching Centre an mamawh thu a sawi a, MYC Chairman chuan Mega Hybrid Coaching Programme Mizoram-a hmun 4 –Aizawl, Lunglei, Siaha leh Kola-sib-ah Centre an hawng tawh tih sawiin, Champhai-ah pawh a tul anga hmalak a nih tur thu a sawi a ni.

ZPM in Candidate tur tifel

Tuirial bial-a Assembly bye-election neih turah ZPM Party chuan an Candidate turin Laltlanmawia, Kolasib chu an ruat fel ta a, an Candidate puanna leh Val Upa Council thu-tiamna hun chu Vawiin chawhnu dar 1:00 hian neih a ni ang. Heti hian Oct. 30-a Tuirial bial Assembly bye-election neih turah Candidate tur mi pathum hriat theih niin MNF atangin K. Laldawngliana leh Congress atangin Chal-rosanga leh ZPM atangin Laltlanmawia te an ni ta a, PC Party in Vawiin ah Candidate tur hi relin BJP in Oct. 4-ah puan an tum bawk a ni.

A thlawna enkawl theih

Mizoram sawrkar-a Health Department chuan COVID-19 inenkawlna a thlawna dawng thei turte leh dilna thehluh dan tur tunhnai khan thuchhuah siamin a tarlang a. Health Department in a hriatpui leh a hnuaia thawktu Healthcare Workers leh thawktu dangte, COVID-19 dona tura in Volunteer-te, COVID-19 damlo, Home Isolation-a awmte enkawltu Care-giver (volunteer) te, Village Level Task Force/Local Level Task Force member-te leh Task Force ten an hnathawh tanpui tura an ruat (volunteer) te leh Deputy Commissioner-in Covid-19 Executive Duty tura a ruat te chu a thlawna enkawlna dawng thei te niin Duty-na atanga COVID-19 hrik kai ni lo, chhan dang vanga kai an nih chuan a thlawna enkawlna hi pek theih an ni lo thung a ni.

Vote thlak ni tur tha ti lo

Peoples' Conference (PC) Party chuan Election Commission of India in Tuirial bial-a Assembly bye-election neih ni atana October 30, 2021 (Inrinni) a ruat chu tha an tih loh thu nimin khan thuchhuah siamin an tarlang a. Vote thlak ni tura ruat hi Kohhran thenkhat te ni serh a nih avangin Voters tam tak ten Vote an thlak thei dawn lo nia sawiin, “Vote thlak ni tura ECI in Inrinni a ruat hi a rang thei ang bera sawn a nih theih nan chak taka hma la turin PC Party chuan Mizoram sawrkar kan ngen a ni,” an ti bawk.

Khuangleng-ah hri kai hmuhchhuah tam

Nimin khan Champhai District chhunga Khuangleng khua ah COVID-19 Mass Testing neih a ni a, tlai dar 5:00 thleng khan Sample 562 enfiah niin heng atang hian COVID-19 hri kai mi 175 zet hmuh niin Vawiin lam hian Sample enfiah hi chhunzawm leh tur a ni ang.

ZPM in mithar lawmluhna hun an hmang

ZPM Party chuan nimin khan Aizawl-a ZPM Conference Hall-ah mi thar lawmluhna hun hmangin he hunah hian ZPM Leader Lalduhoma chuan Pu Thena’n a hun laia a ngaih pawimawh em em Six Basic Needs a taka buaipuitu chu ZPM te an nih thu sawiin, “Kan unau PC-te Vawiin ah hian kan zingah lo tel vek turin tih tak meuhin kan sawm che u,” tiin ZNP lo ni tawhte pawh an zinga tel turin a sawm bawk.

Lalduhoma chuan mi thar duhawm tak tak an neih belh zel tih sawiin, “Zoram kiltin atangin mi thar kan nei ruih ruih a, heng mite hi a hranpaa kan sawm an ni miah lova. Ram leh Hnam hmangaitu dik tak rilru pu, kum 30 chuang kan ram lo hruai tawh tuten kan ram an kaihhruai dan duhkhawp lo a, ram thar beiseite an ni,” a ti a. “Hma kan sawn zel a, kan party hi tluang taka a kal theihna turin inngaitlawm leh inphahhnuai takin Pathian hnenah lawmthu sawi ila, tawngtai bansan lovin chapona lakah kan fihlim theihna turin Pathian i bel tlat ang u,” a ti bawk.