Latest News

COVID-19 vanga thi chhungte tan sawrkar-ah zangnadawmna Rs. 50,000/- dil theih a ni

COVID-19 vanga nunna chan chhungte hnenah zangnadawmna (ex-gratia) mi pakhat tan Rs. 50,000/- pek a ni dawn a, hemi atana inkaihhruaina pawh tihchhuah niin Ex-gratia hi COVID-19 vanga thi te laina hnai (next of kin) tan chauh dil theih a ni dawn a ni.

Disaster Management & Rehabilitation Department in thuchhuah siama an tarlan danin Supreme Court thuchhuak ang leh National Disaster Management Authority (NDMA) leh Ministry of Health & Family Welfare-in inkaihhruaina a siam angin Mizoram Sawrkar chuan COVID-19 vanga nunna chan chhungte (next of kin) tan zangnadawmna (ex-gratia) Rs. 50,000/- a pe dawn a. Zangnadawmna (Ex-gratia) dil turte chuan an chenna District-a Deputy Commissioner (DC) hnenah Sawrkar form siamsa hmangin dilna an thehlut tur a ni.

Ex-gratia diltu chuan an chhung thi ta chu COVID-19 vanga thi a ni ngei a ni tih tarlanna ‘Death Certificate’ an thil tel tur a ni a, Damdawi In-a thi tan Form 4; Damdawi In pawn lama thi tan Form 4A leh Form 4 emaw 4A nei remchang lo tan COVID-19 Death Ascertaining Committee (CDAC)-te pawmpui Certificate thil tel tur niin Death Certificate chungchang emaw, mitthi thih chhan chungchangah harsatna nei an awm chuan an chenna District-a Deputy Commissioner Office-ah, COVID-19 Death Ascertaining Committee (CDAC)-te ngaihtuah turin ziakin complain thlen theih a ni ang. Hei bakah hian Mizoram-a cheng nghet (permanent resident), State pawna COVID-19 vanga boral chhungte pawhin document tul te thil telin an dil thei ang tih sawrkar thuchhuah chuan a tarlang bawk.

Hetihlai hian Mizoram State Disaster Management Authority-a State Executive Committee Chairman leh Chief Secretary Lalnunmawia Chuaungo chuan ex-gratia pek dan tur leh a dil tute tana inkaihhruaina chungchangah thuchhuah siam ve nghalin Ex-gratia hi COVID-19 vanga thi te laina hnai (next of kin) tan chauh dil theih a nih thu a tarlang a. Ex-gratia hi mi pakhat tan zel Rs. 50,000/- zel pek theih a nih thu leh State Sawkar-in State Disaster Relief Fund (SDRF) atanga a pek tur a nih thu a tarlang a. Diltu chuan mitthi laina hnai (next of kin) a ni ngei a ni tih chianna, mitthi chenna Veng/Khua Local Council/Village Souncil hriatpuina lehkha a nei tur a nih thu pawh a tarlang bawk a ni.

Comments

Chhiar Hlawhte