Latest News

MSHCS Governing Body thutkhawm neih a ni

Mizoram State Health Care Society (MSHCS) Governing Body Meeting vawi 25-na chu nimin khan CM Conference Hall-ah neih a ni.

Chief Minister Zoramthanga hova he thutkhawm neih ah hian MSHCS Policy Period chungchang sawiho a ni a. Inenkawlna sum bill pek chungchang ah a awlsam zawk nan MSGCS leh RSBY leh a thlakna AB PM-JAY chu policy period inang a kalpui thin niin, October atanga a kum leh September thleng, thla 12 chhung period a ni thin a. Tunhnaiah sawrkar laipuiin AB PM-JAY Policy period chu sawrkar kum chhiar dan angin April atanga a kumleh March thla thleng turin a thlak a. Hemi anih avang hian MSHCS Policy period pawh AB PM-JAY nena inzul turin, tuna hman mek chu kum chanve chhung atan pawhsei ni se tiin Governing Body thukhawm chuan an rel a ni.

Hetianga pawhsei a nih avang leh kum chanve chhung, October 2021 atanga March 2022 thleng atan tuna policy hman mek chu pawhsei a ni a, member lo ni tawh/lo in enroll tawh tan kum khat atan ni lovin kum chanve tan Premium pek nise tiin rel a ni a; lo la inziaklut ve lo tan pawh inziahluh theih nan ruahmanna siam an rel bawk. Hripui leng avanga ngawrh taka enrollment kalpui chungchang harsatna te pawh sawiho niin, hemi chungchangah hian him zawka ruahmanna siam ngaihtuah ni se tih a ni bawk.

Hei bakah hian hian Governing Body Permanent Member atan Planning and Programme Implementation Department Secretary leh Principal Adviser te chu lak nise tiin an rel bawk.

Comments

Chhiar Hlawhte