ASF tuartute puih tum dan dik an tihloh thu an sawi

Congress Thalaite chuan Sawrkar laipui puihna chauha Vawk hri nasa taka tuartute puih tum chu dik an tihloh thu an sawi.

Nimin-a thuchhuah an siamah MPYCC chuan African Swine Fever (ASF) avanga Vawk suat sakte zangnadawmna pek tur chu sawrkar laipui atanga chhânna engmah a awm loh avangin Mizoram sawrkar chuan Vawk suat a titawp rih tih sawiin, Sawrkar laipui puihna chauha Vawk hri nasa taka tuartute puih tum chu dik an tih loh thu sawiin, sawrkar laipui puihna tel kher lo pawhin Vawk hri avanga a tuartute hi pui turin Mizoram sawrkar chu an ngen tih an sawi bawk.

Vawk vulhtuten nasa taka harsatna an tawh laiin kan State Budget atanga chhawmdawlna an pe duh hauh lo leh an tihsak duh hauh lo chu an dem thu pawh MPYCC chuan sawiin, kumin July ni 31 thleng khan Mizoram sawrkarin sawrkar laipuia Vawk suat neitute mi 5,977 tan zangnadawmna a dil saka chhânna hmuh a la nih loh thu leh kumin August - October chhung hian vawk 48,939 suat tura ruahman ni mah se, suat a ni ta rih lo tih an sawi a. September ni 27, 2021 thleng khan Vawk pul hri vanga thi zat hi 28,458 a tling tawh tih sawiin, Vawk suat pawh 10,297 a tling tawh tih an sawi bawk.