Latest News

Sample enfiah atanga 31.77 ten hri an la kai

Pathianni khan Mizoram-ah Sample 1659 enfiah leh niin heng atang hian COVID-19 hri kai mi 527 hmuh leh an ni a, hri kai hmuh zat hi tlem mah hi Sample enfiah atanga chhut chuan za zela 31.77 zetin hri an kai a ni.

Pathianni khan ZMC-a RT-PCR Laboratory-ah Sample enfiah awm lovin Flourescent Immunoassay (FIA) Test hmanga Sample enfiah a awm lo bawk a. District hrang hranga TrueNat Laboratory te zingah Aizawl leh Lunglei District-ah Sample enfiah 6 awmin heng atang hian COVID-19 hri kai mi 2 hmuh an ni a, Aizawl District-a hri kai hmuh ve ve an ni.

Rapid Antigen Test hmangin niminpiah khan Sample 1653 enfiah ni bawkin hri kai mi 525 hmuhchhuah an ni a, an zinga mi 448 te chu Aizawl District atanga hri kai hmuhchhuah niin Sakawrtuichhun Restricted Area-ah hri kai mi 48 hmuh niin Bethlehem Vengthlang-ah 22 hmuh an ni bawk a, a bak hi Veng leh khua 81 ami te an ni. Lawngtlai District-ah pawh niminpiah khan hri kai mi 20 hmuh niin Champhai leh Serchhip District-ah hri kai mi 16 ve ve hmuh an ni a, Lunglei District-ah hri kai mi 14 hmuh niin Mamit District-ah 8, Kolasib District-ah pahnih leh Saitual District-ah hri kai mi pakhat hmuh an ni bawk.

MIzoram-a COVID-19 hri kai enkawl zingah nimin khan mi 733 te chu enkawl dam an ni leh a, heti hian nimin tlai dar 5:00 thlenga Mizoram-a hri kai hmuhchhuah tawh chu 88,693 niin an zinga 73,646 te chu enkawl dam an ni tawh a, hei hi hri kai hmuhchhuah atanga chhutin za zela 83.03 niin tunah hian hri kai enkawllai 14,746 an awm mek a ni.

Mizoram-a hri kai zingah mi 300 boral tling tawh :

Mizoram-a COVID-19 hri kai hmuhchhuah zingah nunna chan an awm belh zel a, nimin tlai thleng khan hri kai boral hi mi za thum aiin an tam tawh a ni. Nizan hmasa zanlai pelh hnu dar 12:40 khan Lalhmahruaia (71), Kolasib chu boralin nimin zing dar 8:10 khan Laldanglovin (31), Darlawn chu a boral ve leh bawk a, nimin zing dar 8:30 khan Lalhmunsanga (37), Hauruang chu a boral ve leh bawk. Nimin chawhma dar 10:50 khan Nuhliri (82), Bawngkawn chu boral ve lehin Lalvuani (88), Govt. Complex Aizawl chu nimin chawhma dar 11:30 khan a boral ve leh a, Joydeep Naskar (42), Chawnpui Veng (Kolkata atanga lo kal) chu nimin tlai dar 5:00 khan a boral bakah tlai dar 4:00 khan H. Lalrawna (67), Hnahthial Electric Veng chu a boral a, tun thla ni 15-a boral, Christina Lalhmingmawii (23), Bawngkawn chu nimin khan COVID-19 vanga thi te zingah ziahluh a ni ve leh bawk. Heti hian nimin tlai thlenga Mizoram-a hri kai boral chu mi 302 an tling ta a, nimin bikah hri kai boral Mizoram hmun hrang hrangah mi 7 lai an awm leh a ni.

Comments

Chhiar Hlawhte