Latest News

Chanchin thar thenkhat :

Kum 10 hnuailam hri kai tam

September thla kan hman mek chhunga Mi-zoram-a COVID-19 hri kai hmuhchhuah zingah kum 10 hnuailam an tam hle. September thla kan hman mek thla chanve chhungin AMC Area Local Council 85 leh AMC pawn khua/veng 406-ah hri kai hmuhchhuah an ni a, Mizoram pawn atanga rawn lut zingah hri kai mi 16 hmuh an ni bawk a, hri kai zinga mi 2850 te chu kum 10 hnuailam niin 11-20 inkar 3192 leh kum 21-30 inkar mi 2997 an awm bawk a. August thla chhunga hri kai hmuhchhuah zingah chhan hrang hrang vanga Negative Certificate lak tum, inrinhlelh ngaihna hre lo mi 135 awmin, damdawi In-a inentir tura kal, OPD-a Screening lo tih sakna a hri kai hmuh-chhuah mi 176 an awm a, Healthcare Workers 224, LLTF/VLTF Member 20, CCC-a thawk Volunteer Frontline Workers 12, Positive enkawltu mi 26, raipuar mi 22 leh VLTF/LLTF ten misual an man Sample Test sak atanga hri kai tih hriat chhuah mi 6  an awm a ni.


Bye-Election atan inbuatsaih

Tuirial Bial Assembly Bye-election neih tur atan Election Department lamin inbuatsaihna an kalpui tan a, vote thlakna tur hmanrua, EVMs leh VVPATs te chu a thawhkhatna atan enfiah zawh a ni tawh bawk. Joint Chief Electoral Officer, David L. Pachuau chuan bye-election buatsaih turin an inhmakhua tan tih sawiin, inthlan neih hun tur erawh bituk a la awm lo tih a sawi a. ECIL Engineer ten vote thlakna tur hmanrua te a thawh khatna atan an endik zo tawh tih sawi bawkin, inthlan buatsaihna tur thil tul dangte pawh an thlirho mek zel niin a sawi. Tuirial bial bye-election atan hian Mizoram-a Political Party lian 3, MNF, Congress leh ZPM te chuan Nomination Committee an din fel tawh a, Candidate tur tifel erawh an la awm lo.

LADC EM thar te lalut dawn

S Lai Autonomous District Council (LADC) a V. Zirsanga kaihhruai sawrkar thar-a Executive member mi 9 te chu Vawiin hian lakluh an ni dawn.


ZPM Thalai ten CM ngen

ZPM Thalaite chuan Assembly Session neih zawh taka zawhna leh chhanna atanga a lan danin, January 1, 2019 atanga July 31, 2021 inkar hian sawrkâr hnathawk pension tih fel loh, file kal mek mi 302 zet an awm tih thuchhuah siama tarlangin, File la kal lo hi mi eng emaw zat an awm a rinawm bawk tih an sawi a. Sawrkar hna atanga chawl tawh mi thahnem tak pension tihfel lova an awm chu pawi an tih thu sawiin, an harsatnate haider mai lovin an chanpualte dik taka an hmuh thuai theihna tura hma la turin Finance Department changtu Chief Minister Zoramthanga chu an ngen tih an sawi bawk.


Seva Aur Samarpan Abhiyan

BJP chuan 'Seva Aur Samarpan Abhiyan' chu September 7, 2021 atang khan hmangin October 7 thleng khian hman a ni ang. 'Seva Aur Samarpan Abhiyan' hi rampum-ah hman niin Prime Minister Narendra Modi-a piancham Sept. 17 a nih avang leh Chief Minister anih atanga India ram Prime Minister anih kum 20-na pual a midang tana luanchhuahna leh Modi-a hmalak tawhna te mipui hriata puanzarna hun atan a hman tur a ni. Mizoram-ah pawh Zirtawpni khan he Programme hawnna hi neiin India Prime Minister Narendra Modi-a hma-lakna hrang hrangte tarlan a ni bawk.

Comments

Popular News (Last 30 Days)