Latest News

Ni khat-a hri kai hmuhchhuah zat la tlahniam lo

Mizoram-ah ni khat-a COVID-19 hri kai hmuhchhuah zat ala tlahniam thei rih meuh lova, niminpiah khan Sample 8683 enfiah leh niin heng atang hian hri kai 1257 hmuhchhuah niin Sample enfiah atanga za zela 14.48 te chuan hri an kai a ni.

Niminpiah khan ZMC-a RT-PCR Laboratory-ah Sample 1467 enfiah niin heng atang hian COVID-19 hri kai mi 244 hmuh an ni a, an vai hian Aizawl District-a Sample lak te niin Tlangnuam Vengthar-ah hri kai mi 25 hmuh niin Veng mal-a hri kai hmuh tamna ber a ni a, a bak zawng hi Veng leh khua 45 ami an ni. Niminpiah khan Flourescent Immunoassay Test hmangin Aizawl-ah Sample enfiah 205 awm bawkin hri kai mi 49 hmuh an ni bawk a, an vai hian Aizawl khawpui huamchhung ami te an ni bawk.

Heng bakah hian Aizawl District tihloh District hrang hranga TrueNat Laboratory-ah Sample 411 enfiah ni bawkin heng atang hian COVID-19 hri kai mi 109 hmuh an ni bawk a, an zinga 35 te chu Champhai District atanga hri kai hmuhchhuah te niin Lawngtlai District-ah 27, Siaha District-ah 13, Serchhip District-ah 11, Mamit District-ah 10, Lunglei leh Khawzawl District-ah 6 ve ve leh Kolasib District-ah hri kai mi pakhat hmuh an ni.

Rapid Antigen Test hmangin niminpiah khan Sample 6600 enfiah ni bawkin hri kai mi 855 hmuh an ni a, an zinga 604 te chu Aizawl District-a hri kai hmuhchhuah te niin Lunglei District-ah hri kai mi 94 hmuh an ni bawk a, Serchhip leh Lawngtlai District-ah hri kai mi 40 ve ve hmuh niin Mamit District-ah 35, Champhai District-ah 17, Kolasib District-ah 16, Khawzawl District-ah 6 leh Hnahthial District-ah hri kai mi 3 hmuh an ni bawk.

Nimin khan Mizoram hmun hrang hrangah COVID-19 hri kai mi 751 te chu enkawl dam an ni ve leh bawk a, heti hian nimin tlai thlenga Mizoram-a COVID-19 hri kai hmuhchhuah chu 85,366 niin an zinga 70,084 te chu enkawl dam an ni tawh a, hei hi hri kai hmuhchhuah atanga chhutin za zela 82.1 niin hri kai enkawllai 14,997 an la awm a ni.

Chhianchhiahna atanga a lan danin niminpiah khan Mizoram-a hri kai zingah mi 10 zet boralin Mizoram-ah ni khat-a hri kai boral an tam ber tum a ni a. Nimin lama kan rawn tarlan tawh te bakah nizan hmasa dar 7:10 khan Lalrammawia (62), Hauruang chu boralin zan dar 8:00 khan K. Lalhmangaiha (70), Edenthar chu a boral bakah zan dar 11:55 khan N. Beisa (62), Siaha chu a boral bawk. Nimin zing dar 10:30 khan C. Lalramhluna (52), Tuithiang chu boral ve lehin chhun dar 12:00 khan Laltlanhlui (30), Durtlang Leitan chu a boral ve leh a, chawhnu dar 2:30 khan Nupeni (44), New Siaha East pawh boral ve lehin Mizoram-a hri kai zingah mi 285 zet an boral tawh a ni.

Comments

Chhiar Hlawhte