NSS dincham lawmna Sports Minister hovin nei

National Service Scheme (NSS) din champhaphak, NSS Day 2021 lawmna chu nimin khan Aijal Club-ah neih a ni a, he hun hi Sports Minister Robert Romawia Royte chuan khuallian niin a hmanpui a ni.

NSS Day lawmna ah hian Sports Minister chuan Mizoram NSS volunteer te chethatzia sawiin, State chhungah mai ni lo rampum ang pawhin hriat an hlawh, a ti a. Hripui leng karah pawh ram leh khawtlang rawngbawl hna an theih ang anga an thawh thu leh thisen pek leh faina kawngah phei chuan hmahruaitu an nih thu sawiin, NSS te chu tlawmngaihna a taka nunchhuahpuitu an ni tih a sawi a, an rawng-bawlsak ram leh mipui tana malsawmna an nih piah lamah volunteers te pawhin an tawnhriat atangin midangte tanpuitu nih hlutna an zirchhuak a, kawng engkimah mi puitling ni turin a pui a, an thiltih that phenah thilthatitu NSS volunteer te pawhin zirlai tha tak tak an zirchhuak a ni, a ti.

NSS volunteer te hi a thlawna thisen pekah an thawk hlawk hle a. A thlawna thisen pekah hmahruaitu an nih zel theih nan ‘Sports Minister’s Trophy for Voluntary Blood Donation’ chu Sports Minister Robert Romawia Royte hmalaknain sem thin a ni a. Kumin hian College zingah Pachhunga University College chuan thisen Unit 364 pein pakhatna an ni a, Govt. Hrangbana College (thisen Unit 190) leh Lunglei Govt. College (thisen Unit 123) te chu pahnihna leh pathumna an ni. Higher Secondary School atangin Synod HSS, Baptist HSS leh Govt. KM HSS ten lawmman an dawng bawk.

NSS dinchamphaphak hi Mizoram pumah NSS Unit hrang hrangten anmahni rem-chan dan angin an lawm a, a thenin thisen pein anmahni Institution leh vantlang hmun an tifai a. NSS Unit thenkhat chuan an Plantation Site te an tifai bawk a ni.