Mizoram-ah hri kai thar leh dam an pung zel

Mizoram-a COVID-19 hri kai hmuhchhuah la pung zelin hri kai zingah enkawl dam pawh an pung ve zel bawk.

Inrinni khan Mizoram ah Sample 5318 enfiah niin heng atang hian COVID-19 hri kai 1104 hmuhchhuah leh an ni a, Sample enfiah atanga za zela 20.76 zet te chuan hri an kai tih hmuhchhuah a ni. Inrinni khan ZMC-a RT-PCR Laboratory-ah Aizawl leh Mamit District atanga Sample lak 1737 enfiah niin heng atang hian hri kai mi 310 hmuhchhuah an ni a, an vai hian Aizawl District atanga Sample lak vek an ni. Fluorescent Immunoassay (FIA) Test hmangin Inrinni khan Sample 149 enfiah ni bawkin heng atang hian hri kai mi 21 hmuhchhuah an ni a, an vai hian Aizawl-a Sample lak vek niin an zinga mi pahnih tihloh chu Aizawl khawpui chhung ami te vek an ni bawk.

District hrang hranga TrueNat Laboratory-ah Inrinni khan Sample 232 enfiah niin heng atang hian COVID-19 hri kai mi 61 hmuhchhuah an ni bawk a, Lawngtlai District-ah 18, Champhai District-ah 15, Siaha District-ah 13, Serchhip District-ah 8, Kolasib Dsitrict-ah 5 leh Aizawl District-ah hri kai mi 2 hmuh an ni bawk.

Rapid Antigen Test hmangin Inrinni khan Sample 3200 enfiah ni bawkin heng atang hian COVID-19 hri kai mi 712 hmuhchhuah leh an ni bawk a, an zinga 376 te chu Aizawl District ami niin Champhai District-ah 71, Serchhip District-ah 59, Lawngtlai District-ah 54, Lunglei District-ah 49, Kolasib District-ah 40, Khawzawl District-ah 39, Mamit District-ah 17, Hnahthial District-ah 5 leh Saitual District-ah hri kai mi 2 hmuh an ni bawk.

Mizoram-a COVID-19 hri kai zingah Inrinni khan mi 938 enkawl dam niin nimin khan tlai dar 5:00 thlengin hri kai mi 642 te enkawl dam an ni leh bawk a. Heti hian nimin tlai dar 5:00 thleng khan Mizoram-a hri kai hmuhchhuah chu 79,171 niin an zinga 65,098 te chu enkawl dam an ni tawh a, hei hi hri kai hmuhchhuah atanga chhutin za zela 82.22 a ni a, tunah hian hri kai enkawllai 13,814 an la awm mek a ni.

Inrinni khan Mizoram-a COVID-19 hri kai zingah mi 5 lai boral awmin zing dar 12:55 khan C. Vanlalsiama (62), Dawrpui chu boralin chhun dar 12:15-ah Lalhnuna (62), Electric Veng Aizawl chu a boral ve leh a. Chawhnu dar 1:30-ah C. Vanlalhruaia (62), Venghlui Aizawl chu boral ve lehin zan dar 8:30-ah H. Thangkhuma (82), Dawrpui Vengthar chu a boral a, zan dar 9:30-ah Penguka (60), Dawrpui Vengthar chu a boral ve leh bawk a ni. Nimin tlai dar 5:20 khan Rohmingliana (62), Mualkawi chu boral ve lehin nizan dar 7:10 khan T. Pachhinga (84), Tuikual South chu a boral ve leh bawk a, heti hian Mizoram-a hri kai zingah mi 261 lai an boral ta a ni.