Myanmar atangin Mizoram-a raltlan dawngsawng turin khaw hrang hrang an inbuatsaih zel

Tunhnaia Myanmar tualchhung buaina thleng avangin Mizoram chhungah raltlan rawn lut an pung zel a, Tuipuiral Group YMA huamchhunga raltlan rawn lut chu mi sanghnih chuang ni tawhin Lawngtlai District-ah pawh raltlan hi an rawn luh belh zel a ni.

Myanmar tualchhung buaina avanga Mizoram-a raltlan rawn lut hi Tuipuiral Group YMA huamchhungah an pung zel tih Tuipuiral Group YMA President MC. Lalramenga chuan sawiin, raltlan hmasa mi 1,441 an awm mek bakah rawn lut thar mi 896 an avangin tunah hian Tuipuiral huamchhungah raltlan mi 2,347 an kawl mek tih a sawi a. Tuipuiral-a khaw 12 - Zawlsei, Farkawn, Vaphai, Khuangthing, Dungtlang, Thekte, Thekpui, Leithum, Sesih, Sazep, Khuangleng leh Vanzau-ah te raltante awmna tur sak mek niin heng raltlante tan hian anmahni lo khunghranna tur hmun a awm tawh loh avangin Bialtu MLA Ramthanmawia tanpuina leh mi inphal NGO, Kohhran leh mimal te tanpuina nen Relief Camp leh Quarantine Centre sak chhunzawm zel a ni bawk a. Khaw hrang hrangte chu raltlan mikhual thei tura lo inbuatsaihin, khaw thenkhatte chuan an khua-a raltlante tan mutbu, bungbel, thuamhnaw leh buhfai te an thawhkhawm tawh bawk a ni.

Hetihlai hian Lawngtlai District chhunga Sangau lamah pawh raltlan rawn lut awm zelin tun dinhmunah Sangau-I, II, III leh IV huam-chhung ah raltlan chhungkaw 112-ah mihring 501 an awm mek a, heng bakah hian Sangau khaw-chhung ah Refugee Home Quarantine lai 100 chuang an awm mek bawk. Nimin khan Sangau khawchhunga Sangau-I leh Sangau-II VC leh NGO te chuan khawtlang huap hnatlang ko in Myanmar Refugee Camp tur an sa bawk a, mi 500 vel zet an thawkchhuak a ni.

Lawngtlai East bialtu MLA H. Biakzaua chuan nimin khan Sangau hi tlawhin Refugee Camp sa mektu hnatlangte tanpuina atan Sangau Joint VC hnenah Rs.20,000 leh Silpaulin 24 a hlan a, Sangau khua hian tun dinhmun ah raltlan Home quarantine na tur hi mi za chuang lenna an buatsaih lawk tawh a ni.