Geographical Indications (GI) chungchang zirho

NABARD, Mizoram Regional Office Aizawl buatsaihin nimin khan Geographical Indications (GI) chungchang inhrilhfiahna leh zirhona neih a ni.

NABARD Conference Hall, Aizawl-a neih hi Addl. Chief Secretary to Chief Minister JC. Ramthanga chuan hmanpuiin Department pawimawh tak takin Geographical Indication an buaipui chu a läwm thu leh Mizoram nghahfak an nih tih sawiin, Mizoram tán hna pawimawh tak an thawk a ni tih hria a theihtawp chhuah turin sawrkar department leh NGO aiawha kal te a fuih a, Mizo kutchhuak leh tharchhuahte hlawk zawk a hralhchhuah a nih theih nan leh kan vawnhim zel nan GI registration hi a pawimawh hle tih a sawi bawk.

He hunah hian NABARD Mizoram RO General Manager, Lalfakzuali Leivang chuan Mizoram-a loneitu leh kutthemthiamte tih hmasawn nan GI hnuaia kan thilsiam a tam thei ang ber register a pawimawh thu he hunah hian sawiin, GI Pre-Registration leh Post-Registration atana NABARD hnuaia chhawmdawlna dil theihte a tarlang a. Tun dinhmunah Mizoram in GI Product 6- Mizo Chilli, Pawndum, Ngotekherh, Hmaram, Tawlhlohpuan leh Mizo Puanchei a neih mek thu leh Mizo puan pathum leh Handicraft item pahnih GI Tagging turin Angel Business Promoters of Mizoram nen an thawhdun mek thu a sawi bawk.

Nimin-a he hun hmanna ah hian Thenzawl khuaa Handloom tihhmasawnna lama an thawh that avangin Cod Nerc hnenah NABARD Head Office, Mumbai-in Special Award an pek chu Addl. Chief Secretary to Chief Minister hian a hlan nghal bawk a ni.