Latest News

Mizoram State Anti-Tobacco Day vawi 8-na pualin Serchhip-ah hun hman a ni

Mizoram State Anti-Tobacco Day vawi 8-na pualin nimin khan Serchhip-ah hun hman niin kumin chhunga Gutkha atanga thil siamchhuah an man te tihralna hun hman nghal a ni bawk.     Mizoram State Anti-Tobacco Day puala inkhawm nimin chhun-a Serchhip CMO Office-a neih hi National Tobacco Control Programme-a District Nodal Officer Dr. Lalngaihawmi Chhangte chuan kaihruaiin kumin a Mizoram State Anti-Tobacco Day hi September 11 kha ni mah se remchan zawkna avangin Serchhip-ah chuan nimin khan hman a nih thu a sawi a. He hun hmanpuitu Serchhip CMO Dr. Laldawngliana Sailo chuan Tobacco Control Programme chu an Department hnuaia Programme hrang hrang zingah a pawimawh ber pakhat a nih thu sawiin, chutihrual chuan Mizote zingah Vaihlo leh a kaihhnawih hmang kan tam si avangin hmalak chakawm loh tak a nih thu a sawi a, amaherawh chu thawktute hmalakna a zarah tunah chuan hmasawnna tam tak hmuh tur a awm tawh thu sawiin, GTS thar berah chuan Vaihlo leh a kaihhnawih hmang tam lamah pahnihna kan nih tawh thu leh pakhatna atanga pahnihna tlakhniam chu thil huphurhawm tak a nih avangin hmasawnna ropui tak a nih thu a sawi a. Theihtawp kan chhuah chuan hmasawnna a awm zel dawn tih sawiin, Vaihlo leh a kaihhnawih a la inhnamhnawih lo thalai, kum lama naupang zawk te hnenah inzirtirna uar zawka la kalpui a tul thu a sawi bawk.
    He hunah hian Caroline Rinzampuii, Asst. Drug Inspector Serchhip chuan kumin (2021) chhunga an hmalakna te tarlangin kumin chhung hian Anti-Tobacco Squad leh Food and Drug Administration ten Joint Drive tum thum an neih tawh thu leh heng te hi New Serchhip, Thenzawl leh North Vanlaiphai te niin dawr 63 an enfiah atangin Shikhar 1124 leh SS-One pack 643 man a nih thu a sawi a. Heng an thil man te hi Rs. 33,720/- man a ni tih a sawi bawk.
    National Tobacco Control Programme (NTCP) Serchhip District Consultant, K. Hming-thansangi chuan kumin a State Anti-Tobacco Day ah hian 'Thalaite Vaihlo laka Fihlim tura Hmalak' tih a nih thu he hunah hian sawiin, ‘Tobacco Free Generation’ ni tura tan an lak mek laiin tunhnaia Global Tobacco Youth Survey neih ah thalai, kum 13-15 zinga Mizoram chu Vaihlo leh a kaihhnawih a inhnamhnawih tamna a nih thu tarlan leh a ni tih a sawi a. Hetiang hi kan dinhmun a nih mek avangin kan theihna zawn theuh ah tan kan lak tlan a tul thu a sawi bawk.

Comments

Chhiar Hlawhte