Mizoram-a COVID-19 vaccine la thei zingah za zela 87 ten Dose 1-na an la tawh

Mizoram-ah COVID-19 Vaccine la thei zinga za zela 87 te chuan Dose 1-na an la tawh a, Vaccine pekchhuah chungchangah tan lak a ngai lehzual tih Health Minister hova Mizoram-a COVID-19 hripui leng mek dinhmun thlirhona neih ah tarlan a ni.

Inrinni khan Health Minister Dr. R. Lalthangliana hovin SAD Conference Hall-ah Mizoram-a COVID-19 hripui leng mek dinhmun thlirhona neih a ni a, he hunah hian Health Minister chuan hripui leng dona kawnga thahnemngai taka thawktu pawl hrang hrang, Kohhranho te, Tlawmngai Pawl te, Medical Team leh VLTF/LLTF, Frontline Workers te leh sawrkar hnathawk zawng zawng ten theihtawp mahni zawn theuha an chhuah avanga lawmthu sawiin, “Kan dinhmun erawh kan beisei ang a ni thei rih lova, hetih mek laia beidawn leh chauh sawi lova theihtawp chhuah tang tanga kan la tang tlang tlat thei hi a ropui tak zet a, kan thawhhona a that avangin mipui nghawng tur thutlukna siam a tul chang pawhin rilru inhawng zau taka kan inrawnkhawm zel theite hian hma lak a ti awlsam a ni,” a ti.

He hunah hian Vaccine pekchhuah chungchangah tan lak a ngai lehzual tih tarlan niin tunah hian First Dose hi 87% in an la tawh a, vaccine lak tlemna District-ah te beihpui thlak tum a nih thu sawi niin, harsatna hrang hrang vanga vaccine lakna hmun pan ve thei lo te chhuichhuaka a tul anga Mobile Team din-a an chenna In-a kalchilh tura ruahmanna siam tha tih a ni.

Hei bakah hian ZMC dinhmun pawh he hunah hian ngaihthlak niin ICU khum 34 leh Ward hrang hranga Khum awmte a khat deuh reng a, damlote zingah serious an tam hle bawk a, tunhnaiah phei chuan kum upa lam aiin kum la naupang zawkte zingah ICU Ventilator support mamawh an tam tawh hle zawk tih a tarlan a ni. ZMC-ah thawktu an indaihlo hle tih pawh tarlan niin, a bik takin Staff Nurse indaihlohna nasa zualin, an mamawh ang zat thawk tur mihring an inhmu zo lo tih sawi a ni a, sawrkarin volunteers 123 lak a phalsak te pawh lak fel an ni a, an zinga mi 26 in an chawlhsan leh tawh a, anmahni thlaktu tur hi an la zawng hmu zo lo a ni.

SEDP hmanga siam Oxygen plant 200 LPM chu tunah hian a khawl tihnun reng a ni a, PM-CARES atanga hmuh 300 LPM pawh tluang taka hman niin, PM-CARES atanga hmuh tho 1000 LPM pawh a khawl dahna tur In sak zawhfel tawh a ni a, hnathawktu CPWD te pawhin khawl bun hna an zo tep tawh a ni.

District Hospital-a Doctor leh Nurse te COVID-19 hrikaite enkawl dan tur (critical care) Practical Training ZMC-a neih tir a pawi-mawh thu he hunah hian sawilan niin, Civil Hospital, Aizawl-a COVID-19 hri kaite enkawlna tur ICU khum 10 chu peihfel thawkhat tawh niin, Pediatrics ICU khum 4 awmna pawh zawhfel tep a ni a. ZMC-ah ICU Ward siam belh leh a tul thu pawh sawi niin a tul anga hmalak tum a ni bawk. 

Hei bakah hian Zin veivakte lo buaipui dan leh Quarantine dan inkaihhruaina hman lai mek chu ennawn tul nia hriat a ni a, Sample Test kalpui dan pawh a tul anga thuneituten ennawn tha tih a ni bawk a, hengah te hian rawtna chi hrang hrang a lut hlawm a ni.

Vaccine pek tawh dan dinhmun :

Mizoram-ah COVID-19 vaccine la tawh zat an pung zel a, Inrinni thleng khan mi 6,69,825 te chuan Dose 1-na la tawhin an zinga 3,63,672 te chuan Dose 2-na la tawhin Vaccine an lak tur ang an la zo tawh a, tun thlengin Mizoram-ah hian Vaccine Dose 10,33,497pek a ni tawh a ni. Ser-chhip District-ah chuan mi 40,468 hnenah Dose 1-na pek ni tawhin an zinga 25,203 te chuan Dose 2-na la lehin Vaccine an lak tur an la kim tawh a ni.