Raltlan te tanpuina pe turin MZP an thawkchhuak

Mizo Zirlai Pawl (MZP) General Hqrs. hruaitute chu Myanmar atanga raltlan, Mizoram khaw hrang hranga awmte thlamuan tur leh tanpuina pe turin nimin khan an thawkchhuak.

Heng MZP General Hqrs. hruaitute thlahna hun hi nimin zing khan Aizawl-a MZP Pisa Pui tual-ah neih niin he hunah hian MZP President B. Vanlaltana chuan raltlan tanpuina tura damdawi, choka bungrua, thawmhnaw chi hrang hrang leh mutbu thahnem tak ui lova thawhtute chungah lawmthu sawiin, “Kan thil tih hian hriat a hlawh reng tawh ang a, Hnam anga inpumkhatna tha zawk a siam zel dawn a ni,” a ti.

Mizoram Chemist & Druggist Association (MC&DA) chuan MZP hnenah hian Damdawi chi hrang hrang Case 34 (cheng nuaih 10 chuang hu) hlanin Mizoram Bungbel Zuar Association (MBZA) chuan Rs. 25,000/- hu eirawngbawlna bungbel chi hrang hrang Pik-up trip khat zet an hlan bawk a, Mizoram Second Hand Zuartu hrang hrang ten thawmhnaw chi hrang hrang Bale 16 leh Mutbu (Blanket) Bale 6 a vaiin Rs. 3,27,000/- hu hlanin All Mizoram Petroleum Dealers Association (AMPDA) in Mizoram khaw hrang hrang kal velna atan Diesel leh Petrol an hlan bakah Champhai Import & Export Trade Union (CIETU) in pawisafai an hlan bawk a, heng an thil dawn hrang hrangte hi raltlan te hnenah hian semchhuah a ni dawn a ni.