Mizoram-a National Highway siamtu Company te chak tak leh dik taka hna kalpui turin hriattir

Mizoram sawrkar-a Road & Infrastructure Development Board chuan Mizoram chhunga National Highway hrang hrang siam hna thawk mektu Construction Company te chu an hnathawh mek te chak tak leh dik taka hna kalpui zel tura hriattirin an hnathawh te pawh an enzui reng tur thu an sawi.

Mizoram chhunga National Highway laih mek hrang hrang- NH. 54 (Aizawl to Tuipang), NH. 6 (Selling - Dulte - Champhai), NH.102B (Keifang to Tuivai) leh NH. 44(A), Dapchhuah atanga Dampui inkar-a hna kal mek chungchanga hmalak dan te sawiho in nimin khan Road & Infrastructure Development Board Vice Chairman Er. H. Lalzirliana hovin a Pisa-ah RIDB Members, PWD hotute leh Road Construction Company te an thukhawm a. Mizoram chhunga National Highway hrang hrang siam hna thawk mektu Construction Company te chu chak tak leh dik taka hna kalpui zel turin Road & Infrastructure Development Board Meeting chuan hriattirin, heng kawngpui siam hna thawk mek company te chu an hnathawh mek ah a tulin angin Board leh Department pawhin an en zui reng tur thu an hriattir bawk a. Heng Infrastructure hrang hrang te hi Mizoram tan leh Mizo mipuite tana rohlu tur a nih avangin a tha thei ang bera buatsaih chu a siamtu Company te tihtur a nih thu an sawi bawk.

He hunah hian NH. 44A hmalakna kal mek chungchang sawiho niin Ministry of Road Transport and Highways-a Revised Estimate kum 2 lai tang tawh chu chinfel thuai a nih theihnan hmalakna chak taka kalpui tura ruahmanna siam a ni a. Working Season hmasa leh bera zofel thei tura hmalak ho dan tur an sawiho a. Tun dinhmun ah NH.44A, Dapchhuah atanga Dampui inkar kawng siam mek chu Fur ruahtui vangin kaltlang a harsa a. Hetih hun chhung atana inkalpawhna tur atan Dapchhuah atanga Dampui Diversion Road chu Board Meeting chuan cheithat hna thawh thuai nise an ti bawk.

Hei bakah hian kawngpui siam hnathawh mek hrang hrang - NH. 54 (Aizawl to Tuipang), NH. 6 (Selling - Dulte - Champhai), NH. 102B (Keifang to Tuivai), Lunglei to Tlabung road, Vairengte to Sairang, Muallungthu to Sihhmui leh Aizawl By-pass Road tur hmalakna chungchang NHIDCL hotute nen sawiho nghal a ni bawk a. Kan ram leilung awmdan te zirchiang a, tha taka hnathawk turin an ngen bawk a ni.