Chanchin thar thenkhat :

Sawrkar hmun tur ruahman

Nimin khan Khawzawl District Land Committee chu District Bawrhsap C.C. Lalchhuangkima hova thukhawmin DIG (Eastern Range) Office, SP Residential Complex leh Legal Metrology Department hnuaia Working Standard Laboratory hmun tura Joint VC in an ruahman chu pawm a ni a,  District Consumer Dispute Redressal Commission leh Cooperation Department hmun tur remchang enfel turin Joint VC ruat niin Khawzawl Power Division-in Control Room leh Quarters sakna tur an dil pawh ruahman sak an nih tawh thu tarlan a ni a. DLAO Complex hmun tur pawh la en ho tura ruahmanna siam a ni bawk.

NABARD kalphung inhrilhfiah

Nimin khan Kolasib DC Conference Hall ah NABARD kalphung inhrilhfiahna leh Bank leh Sawrkar Department hrang hrang inkar a thawhhona kalpui dan tur inzirtirna neih a ni a, he hunah hian NABARD-a Kolasib District Development Manager JD. Traite chuan NABARD in thuang thum angin, Business, Supervision leh Development & Promotion anga hma an lak dan sawifiahin, KCC loan rul thate tan a pung rulh tur chungchangah inngaihnathiamna thui tak a awm bawk thu a sawi a. Bank hrang hrangah loan rul tha lo an awm thin avangin loan pek chhuah kawngah timna a awm thin thu pawh a sawi bawk.

Electoral Literacy Club din

Nimin khan Govt. Khawzawl College Multipurpose Hall-ah Election leh Election kaih-hnawih thil chi hrang hrang inzirtirna tur Electoral Literacy Club (ELC) din a ni a, he hun hi Election Officer H. Lalramenga chuan hmanpuiin Voter thalai leh naupang zawkte zingah Election awmzia leh kalphung chu tawngkaa sawi leh ngaihthlak mai ni lo, a taka hmuh theih tura inzirtir nan ELC chu din a ni, a ti. Electoral Literacy Club-ah hian College zirlai mi 80 an inziaklut nghal a ni.

Lui-a zuangthla ruang hmu

Pathianni kalta-a Hnahthial leh Tarpho inkar Tuichang Lei atanga Tuichang lui-a zuangthla ta H. Rosangliana (41), Hnahthial Venglai chu mi tlawmngai ten Pathianni atanga an zawn hnuah nimin zing dar 5:00 vel khan a ruang hmuh a ni ta a, a ruang hi Postmortem a nih hnuah nimin vek khan vuiliam nghal a ni. H. Rosangliana hi tunhma lamah pawh rilru lamah harsatna (mental illness) a lo nei tawh thin niin Pathianni atang khan Hnah-thial-a YMA Branch 8 te chuan tui tla zawn hna hi an thawk a, nimin-a a ruang an hmuhna hi Lei atanga luimawng lam KM 2 vel a nih thu Hnahthial atanga kan thudawnna chuan a sawi bawk.

ZPM-ah mithar lawmlut

ZPM Working President K. Sapdanga chuan nimin khan Mamit tlawhin Mamit Central Block ZPM buatsaiha inkawmkhawmna hunah mithar 421 a lawmlut a. He hunah hian K. Sapdanga chuan Tuirial bial-a Assembly bye-election neih tur chu an tan a pawimawh em em tih sawiin, “Party dang tan chuan election a ni a, keini tan erawh chuan lusunna hmun a ni. Kan MLA mual min liamsan ta Pu Andrew-a hnung zui zo ngei turin hna kan thawh a ngai a, a huphurhawm em em a ni,” a ti a. An Party zawm thar te chu an awmna hmuna theihtawp chhuah zel turin a chah bawk.

Online kaltlang chauhin Disability Certificate dil theih

Mizoram Sawrkar chuan September 22, 2021 khan hriattirna tichhuakin, sawrkar laipui Ministry of Social Justice & Empowerement duhdan angin Certificate of Disability chu UDID portal www.swavlambancard.gov.in kaltlanga chauhin dil tawh tur a ni tih a tarlang.