Latest News

MYC leh MFA an thawkdun dawn

Football hmasawnna tur leh thalaite eizawnna kawhhmuh kawnga thawkdun turin Mizoram Youth Commission (MYC) leh Mizoram Football Association (MFA) te chuan nimin khan Thawhhona Thuthlung an ziak.

MYC Conference Hall, Aizawl-a Thawhhona Thuthlung ziahna hunah hian MYC Chairman, Dr. Vanlaltanpuia chuan MFA nen an thawkdun tur chu lawmawm a tih thu sawiin, “MYC hi thalai zawng zawng huap tur a ni a, thalai zinga lehkhathiam deuh bîkte pual a ni lo a, thalai tute pawhin an ban phak a ni tur a ni. Hemi kawnga MFA nen tang khawpa thalai tam zawk tana eizawnna kawng kan dap thei tur hi ka läwm takzet a ni,” a ti a. MFA Honorary Secretary Lalnghinglova Hmar pawhin MYC nen an thawkdun tur chu MFA tán a chhinchhiahtlak tih sawiin, Football khelmual chhungah mai ni lo, khelmual pawnah pawh eizawnna tur tam tak haichhuah tur a awm thu sawiin, Coach Education hi chumi kawngah chuan a tangkai thu a sawi bawk.

Inremna ah hian MYC leh MFA hian kum 2021 chhungin Football Coaching Development Programme leh Football Symposium an buatsaih dâwn a, heng te hi MFA-in a buaipui ang a, a senso hi MYC lam tum tur niin Rs. 4,95,575/- dah a ni. MFA hian Football Coach-te tan Coaching License Course hrang hrang a buatsaih thin a, hengte hi hripui leng avangin hun engemaw chen kalpui theih a ni lo a, hei hi MYC nen thawkdunin chhunzawm leh thuai a tum a ni bawk.

Comments

Chhiar Hlawhte