Mizoram-ah hri kai 76,591 hmuh an ni tawh

Niminpiah khan Mizoram-ah Sample 7809 enfiah niin heng atang hian COVID-19 hri kai mi 1121 hmuhchhuah leh an ni a, Sample enfiah atanga za zela 14.35 te chuan hri kaiin Mizoram-a hri kai hmuhchhuah chu 76,591 an tling tawh.    Niminpiah khan ZMC-a RT-PCR Laboratory-ah Sample 1056 enfiah niin heng atang hian COVID-19 hri kai 247 hmuhchhuah an ni a, heng hri kai hmuhchhuah te hi Aizawl District-a Sample lak vek niin hri kai hmuhchhuah tamna ber Salem Veng-ah hri kai mi 24 hmuh niin Phunchawng-ah hri kai mi 21 hmuh an ni bawk a, a bak zawng hi Veng leh khua 54 ami te an ni. Fluorescent Immunoassay Test hmanga Sample 138 enfiah atangin hri kai mi 16 hmuhchhuah an ni bawk a, an vai hian Aizawl khawpui chhung ami te vek an ni bawk.

    Niminpiah khan District hrang hranga TrueNat Laboratory-ah Sample 405 enfiah ni bawkin heng atang hian COVID-19 hri kai mi 85 hmuh an ni bawk a, Lunglei District atangin hri kai mi 24 hmuh niin Lawngtlai District atangin 21, Champhai District atangin 16, Kolasib District atangin 13, Khawzawl District atangin 7 leh Aizawl leh Serchhip District atangin hri kai mi 2 ve ve hmuh an ni bawk.

    Rapid Antigen Test hmangin niminpiah khan Sample 6210 enfiah ni bawkin heng atang hian COVID-19 hri kai 773 hmuh an ni a, heng zinga 461 te chu Aizawl District-a hri kai hmuhchhuah te niin hri kai mi 10 aia tam hmuhna Veng leh khua 15 awmin a dang te hi Veng leh khua 69 ami te an ni a. Heng bakah hian Lunglei District atangin hri kai mi 108 hmuh ni bawkin Lawngtlai District-ah 72 Kolasib District-ah 47, Mamit District-ah 28, Serchhip District-ah 22, Champhai District-ah 20, Hnahthial District-ah 7, Saitual District-ah 5 leh Khawzawl District-ah hri kai mi 3 hmuh an ni.

    Mizoram-a COVID-19 hri kai zingah nimin khan tlai dar 5:00 thlengin mi 544 te chu enkawl dam an ni ve leh bawk a, heti hian nimin tlai dar 5:00 thlenga Mizoram-a hri kai hmuhchhuah chu 76,591 an tling tawh a, an zinga 62,993 te chu enkawl dam ni tawhin hei hi hri kai hmuh tawh atanga chhutin za zela 82.25 an ni a, tunah hian hri kai enkawllai 13,344 lai la awmin hri kai enkawllai zinga a tam zawk, 8709 te chu Aizawl District a enkawl an ni a, District tinah hri kai enkawllai hi an la awm vek bawk a ni.

    Hetihlai hian Mizoram-a COVID-19 hri kai zinga boral chu mi 254 zet an tling tawh bawk a, nizan hmasa dar 9:48 khan Lalchhanhima (39), Chanmari Aizawl chu boralin hemi hnu nizan hmasa dar 10:10 khan Lalremkima (30), Kolasib Hmar Veng chu a boral ve leh a, nimin zing dar 2:10 khan Lalrinhlui (45), Darlawn Venghlun chu a boral ve leh bawk a ni.