Latest News

MPCC in Health lam enkawltu pahnih te hripui do thei tur hnenah mawhphurhna hlan turin an ngen

Mizoram Pradesh Congress Committee (MPCC) chuan COVID-19 dona kawngah Health lam enkawltu pahnih in an mawhphurhna an hlen zo lovin, kal ngaihna an hriat tawh loh thu sawiin, Dr. R. Lalthangliana leh Dr. ZR. Thiamsanga te chu an mawhphurhna an hlen zo lo tih hi pawm a, mi thar chak zawk, rilru leh tha thara hripui do thei tur hnenah mawhphurhna hlan mai turin an ngen nawn.

Nimin-a Aizawl Press Club-ah thuthar thehdarhtute an kawmnaah Congress thupuangtu Dr. Lallianchhunga chuan, “Health Minister Dr. R. Lalthangliana enkawlna hnuaiah MNF sawrkar hi hri dona kal ngaihna an hre ta lo a ni ber mai. RT-PCR Laboratory din belh ngaihna an hre lo a, COVID-19 Medical Operation Team (MoT) Chairman Dr. ZR. Thiamsanga pawhin tihngaihna an hriat tawh loh thu hi zing tawngtai inkhawmnaah a sawichhuak ta hial a ni,” a ti a. September 7-9, 2021 a Assembly Session-ah zawhna thehluh zingah H&FW Minister in chhanna a pek theih loh zawhna 36 awm tih sawiin, “Zawhna thenkhat phei chu hripui dona kawnga sawrkar inbuatsaihna chungchang te, hri dona atana sum hman dan chungchang te a ni chungin Health Minister berin chhanna a pe thei tlat lo,” tiin, hei hian H&FW Department kalphungah zawhna tam tak a siam niin a sawi bawk.

Dr. Lallianchhunga chuan COVID-19 dona kawnga Health lam enkawltu pahnih te hi an hlawhchham chian hle laiin, anmahni sumdawnna tur building thar sak lamah erawh an hlawhtling hle thung nia sawiin, COVID-19 avanga ram pum buai laiin, Health Minister chuan Home Stay tur building lian tak a sa zo tawh a, hmanni lawka Best Citizens of India Award dawngtu Dr. ZR. Thiamsanga BN Hospital Nursing School tur pawh Hualngohmun-ah, Aizawl-Lunglei World bank Road nek chepin sak mek anih thu sawiin, “He building sak mek hi Dr. Thiamsanga hminga sak ni lo mah se, a Hospital Nursing School tur a nih avangin thuk takin neitu nihna a neih ve ngei kan ring,” a ti bawk.

Health Minister bang tura nawr chung-changah Dr. Lallianchhunga chuan, “Ruahmanna kan nei mek a. Hmalak dan tur engemaw chen kan sawiho ang a, kan ruahmanna te chu party hruaitute hnenah kan pharh ang. An pawmpui chuan karleh khian COVID-19 laka himna tura inkaihhruaina zawm chungin Vanapa Hall kawt-ah kan inhmuh ngei ka beisei a. Keini chuan tharum hmanga innawr kan duh lova, zahawm tak leh puitling takin he thu hi au chhuahpui kan tum a ni,” a ti bawk.

Comments

Popular News (Last 30 Days)