Serchhip bialtu MLA in a bial chhunga hri kai enkawlna hmunah tanpuina a hlan

Serchhip bialtu MLA Lalduhoma chuan nimin khan Serchhip bial rawn tlawhin COVID-19 hri kai enkawlna hmun hrang hrangah hri leng dona atana hmanraw pawimawh te a hlan.

Serchhip bialtu MLA hian Thenzawl tlawh hmasa in Integrated AYUSH Hospital (IAH) CCC tan Buhfai quintal 7, Oxygen Concentrator 1, PPE Set leh Test Kit a hlan a, Thenzawl Venghlun Industries Complex-a 4C, Police Training School (PTS)-a CCC leh Thenzawl CHC te tlawhin heng hmunah te hian hri leng dona hmanraw hrang hrang a hlan bawk a ni.

Hemi hnu hian bialtu MLA hian Serchhip rawn pan nghalin Serchhip District Hospital-a a tul anga hman turin District Surveillance Officer, Dr. Lalngaihawmi Chhangte hnenah N95 Mask 200, Face Shield 200, Surgical Mask 100 leh PPE Set 15 a hlan a. Serchhip Sub-Hqrs. YMA hnenah Oxygen Concentrator pawh a hlan nghal bawk a ni. Bialtu MLA hian Serchhip khawpui chhung, a Bial chhunga khawtlang in hri kai enkawlna hmun an din 4C te pawh tlawh nghalin 4C Serchhip Vengchung, 4C UPC Kohhran Hall, 4C Chhim Veng leh 4C Marian H/S te chu Test Kit leh pawisafai Rs. 5000/- te a hlan bawk a. Nimin a bialtu MLA in MLA Fund atanga thilpek a sem te hi Oxygen Concentrator (2); N95 Facemask (400); Faceshield (400); Surgical Mask (200); PPE Suit (80); Test Kit (1,000) leh Buhfai (15 qtls.) te a ni. 

Bialtu MLA Lalduhoma chuan Thenzawl leh Serchhip a hman turin Sample Test na khawl, Mizoram a la awm lo, COVID-19 test na leh natna dang test nan pawha tangkai taka hman theih cheng nuai 5 man vel, South Korea siam, Standard F200 Analyser chah mek anih thu leh hun reilote ah Thenzawl leh Serchhip tan pakhat ve ve pek a tum thu a sawi bawk.

Nimin-a heng thilpek a hlanna ah hian bialtu MLA hi ZPM Party hruaitu ten an tawiawm a ni.