Chanchin thar thenkhat

CM in kawng siam a hawng

    Aizawl Municipal Corporation (AMC) in cheng nuai 300.30 senga Aizawl Chanmari - Chal-tlang inkar Pavement siam leh kawng zauh hna an thawh chu nimin zing khan Chief Minister Zoramthanga chuan a hawng a, he hunah hian Chief Minister chuan kawng siam chungchangah thiamna a sang zela, hmana huphurhawm thin kha harsa lutuk lo a tih dan thiamna chharchhuah belh a nih zel thu sawiin, kawng zauh leh siamthat hna tha zawk pawh thawh belh theih zel a beisei thu a sawi bawk. January 25, 2019 khan Footpath siamna tur project, AMRUT Incentive atanga cheng nuai 100 hmuh hmangin Chanmari leh Chaltlang inkarah meter 253 (830 ft.) chu thawh tan a ni a, kawng hi zauh tel tura ruahmanna siam niin AMC sum cheng nuai 200.30 sen belhin, footpath mai bakah kawng zauhna hna pawh hi thawh tel a ni ta a ni.

Ruahmanna kalpui mek a ni

    Agriculture Minister C. Lalrinsanga chuan kuthnathawktu ten theihtawp chhuaha kawl-a ni chhuak chhiara thlantui nena hna an thawh laia Kharchhawng (Middle Man) ten kuthnathawktu aia uchuak taka a hlawkna an lo tel nasa zawk thin chu Sawrkarin tha lo a ti tih nimin-a Lung-leng-I Vawkzawnparh Chuanhnuai ram Lo zawh a hmanpuina ah sawiin, hemi veng tur leh khaw-puia cheng mipuiten awlsam taka kan ram tharchhuah te an hmuh zung zung theih nan Food, Vegetables & Livestock Market Chain Management nghet, Cooperative kalphung zulzuia MAHFED leh MIZOFED te nena tangkhawmin Sawrkar in ruahmanna a kalpui mek tih a sawi.

I&PR Minister in hmanpui

    I&PR Minister Lalruatkima chuan Aizawl Vaivakawn kum 120 tlin lawmna leh Branch YMA Golden Jubilee lungphum hawnna chu nimin zing khan Vaivakawn Bazar-ah a hmanpui a, Vaivakawn Branch YMA Golden Jubilee lawmna hi kumin March 16 atang khan kalpuiin kawng hrang hrangin a lawmna hun hi hman a ni.

Hri leng dona hmanrua hlan

    Mamit District tana ACT Grants & Swasth Digital Health Foundation leh World Vision India te'n Covid-19 dona tura hmanraw chi hrang hrang an pek chu nimin khan bialtu MLA, Er. H. Lalzirliana chuan Mamit District CMO leh DMS hnenah a hlan a. Mamit District tan hian ACT Grants & Swasth Digital Health Foundation atangin Oxygen Concentrators 20 dawn niin pakhat hi Rs. 71,563/- man zel niin, a vaiin Rs. 1,502,832/- man a ni a. Word Vision India hnen atangin hmanraw dang chi hrang hrang Rs 1,037,500/- man vel dawn a ni bawk.

DC in hnathawh mek tlawh

    Khawzawl District Bawrhsap CC. Lalchhuangkima chuan nimin khan Khawzawl Darngawn ram a bawlhhlawh sakhat sawng-bawlna tur hmun, Solid Waste Management Centre sak mek chu a hmunah a tlawh a, he Centre hi UD&PA Department hnuaia sak niin tun dinhmunah kawngpui atanga a hmun panna kawng chu RCC in siam zawh tawh a ni a. A hmun tur hi metre 36 a zau, metre 48 a thui (1728 square metre) a laih zawl tawh a ni bawk. Hei bakah hian a enkawltute chenna tur panna tur link road metre 150 laih a ni tawh bawk.