Chanchin thar thenkhat :

MYC in hmalakna tur puang

Mizoram Youth Commission Chairman Dr. Vanlaltanpuia chuan IAS Aspirants te tana Mizo-ram chhunga Coaching Class kalpui dan tur chu nimin khan puangin he programme hi ‘Mega IAS Scholarship for 100 IAS Aspirants of Mizoram’ ti a hming vuahin kalpui a ni dawn a. Hybrid Coaching Class hmanga kalpui tum a ni a, MYC chuan ALS Satellite Education Pvt. Ltd. nen thawhhona thuthlung ziakin ALS-a an National Sales Head, Prateek Bhattacharya chuan ALS aiawha hming a ziak a ni. He programme hnuaiah hian IAS aspirants mi 100 te exam kaltlanga thlanchhuah an ni ang a, Aizawl, Lunglei, Siaha leh Kolasib Centres-ah te Class hi kalpui a ni ang. He programme hnuaia senso tur hi MYC in cheng nuai 60 a tum anga, ALS lam hian an CSR Initiative atangin a bak cheng nuai 34 hi an tum thung dawn a, December ni 1, 2021-ah Class tan tura beisei a ni.

Skill Training buatsaih dawn

Hrileng avanga eizawnna kawnga harsatna tawk mek ten eizawn nana thiam thil nghet an neih theih nan Mizoram Youth Commission kaltlanga ‘Skill Development Training’ buatsaih dan tur relin nimin khan Kolasib-ah Core Committee on Skill Development chu an thukhawm a. Skill Development Training hi thuang thum-a kalpui tur niin Cement Mistiri training mi 40 tan ni 45 chhung kalpui tur a ni anga, Piggery-ah mi 20 tan ni 15 chhung leh Bakery-ah mi 20 tan ni 60 chhung zirtirna pek an ni dawn bawk a ni. Training hi thla thar October 4 atanga neih tur niin Training-a tel te hi Certificate bakah hnathawhna tur hmanrua pein an training chhung hian Stipend pek an ni bawk ang.

Supply Minister in hawng

Supply Minister K. Lalrinliana chuan nimin khan Lawngtlai-ah cheng vbc. 19.22 senga buhfai Metric tonne 1000 dah theihna tur Principal Distribution Centre (PDC) building thar leh Working Standard Laboratory building te a hawng.

RT-PCR Mobile Van pe dawn

Mizoram Lok Sabha MP C. Lalrosanga leh OSD to Chief Minister Rosangzuala te chuan nimin khan Union Health Minister Mansukh Mandaviya chu New Delhi-ah an hmu a, he hunah hian Union Health Minister chuan RT-PCR Mobile Van (Infectious Disease Diagnostic Laboratory, I - LAB) pahnih Mizoram tan pek a remtih thu a lo hrilh a, COVID-19 hri kai leh kai lo te test-na tur bakah ICU hmanrua leh Ventilator-te pawh Mizoram pek belh tum mek a nih thu a lo hrilh a, heng atan hian Mizoram tan budget pawh ruahman a nih thu leh pawm a nih hunah khawl leh hmanrua te hi pek belh a nih tur thu a lo hrilh nghal bawk a ni.

Raltlan chungchang sawipui

Myanmar rambuai avanga harsatna tawk Zohnahthlakte tana Lunglei-a tlawmngai pawl hrang hrang te telna, Steering Committee For Myanmar, Lunglei hruaitute chuan nimin khan Chief Minister Zoramthanga chu a Office-ah hmuin Myanmar raltlante chungchang an sawipui a. He hunah hian Chief Minister chuan raltlan te chu Sawrkar in a theih ang tawkin a ngaihven thu leh thla hmasa khan cheng nuai 3 sawrkarin a lo senral thu leh tunah hian cheng nuai 5 ruahman fel leh tawh a nih thu a sawi a, Raltlante chung-chang chu Sawrkar laipui-ah thlen leh bawhzui a nih reng thu a sawi bawk.