Mizoram State Super-Speciality Cancer and Research Centre sakna tur Project hawn a ni

Japan International Cooperation Agency (JICA) tanpuina a cheng vbc 500 man tur Mizoram State Super-Speciality Cancer and Research Centre sakna tur Project chu nimin khan hawn a ni a. JICA hotute chuan kum 2023-ah hna thawh tan an inbeisei thu an sawi.

Mizoram State Super-Speciality Cancer and Research Centre sakna tur Project hawnna hi Internet kaltlanga neih niin he hunah hian Health Minister Dr. R. Lalthangliana chuan JICA in Mizoram ngai pawimawha Project hlu tak leh rotling turah hma an rawn la chu lawmthu a sawi a, Cancer in Mizoram a nghawng dante sawilangin, kan theihtawp kan chhuah chung pawh hian harsatna kawng hrang hrangah kan neih thu leh heng ah te pawh JICA in ruahmanna leh rawtna fel tak nena ngaihtuahna an senpui avangin lawmthu a sawi a, he project hlawhtlinna tur hian Mizoram sawrkar chuan theihtawp a chhuah dawn tih a sawi bawk.

Mizoram State Super-Speciality Cancer and Research Centre sakna tur project proposal hi May 10, 2019 khan thehluh a ni a, Health Minister leh Health Department hotuten hmunpui lamah an bawhzui hnuin August 14, 2019-ah Department of Economic Affairs chuan an pawm a, November 11, 2019 khan Public Health Foundation of India (PHFI) leh Mizoram sawrkarin DPR siam tura MoU ziakin, May 7, 2020 khan Mizoram sawrkarah DPR kimchangin thehluh a ni a, Ministry of Health & Family Welfare, Govt. of India ah thehluh niin buaipui ngai te buaipui a nih hnuah Aug. 31, 2021 khan Health Minister Dr. R. Lalthangliana hian Union Health Minister kutah a hlan a ni.

JICA hotute chuan kum 2023-ah hna thawh tan an inbeisei thu sawiin, senso tur hi cheng vbc. 500 niin, JICA loan cheng vbc. 400 (80%) puk tur a ni a, Mizoram sawrkar tum ve tur hi cheng vbc. 100 (20%) a ni a. Loan hi India President hminga puk niin, a hna thawktu tur hi Mizoram sawrkar a ni. Kum 5 chhunga thawh zawh tura ruahman niin, loan hi kum 30 chhunga rulh zawh tur a ni a, kum 10 dang pawhsei theih a ni ang.