Hectare 290.50-ah zau-ah Rawmi chingin a puitlin huna hralhna tur ruahman a awm rihlo

Horticulture Department changtu Chief Minister, Zoramthanga chuan Rawmi (Dendrocalamus Sikkimensis) chu Mizoram hmun 12-a ram Hectare 290.50 a zauah chin mek a ni tih sawiin, chutihrual chuan a puitlin huna a hralhna turah ruahmanna a la awm rih lo tih ZPM Legislature Party Leader, Lalduhoma zawhna chhangin a sawi.

Nimin-a Assembly thutkhawm zawhna leh chhanna hunah Chief Minister Zoramthanga hian Rawmi (Dendrocalamus Sikkimensis) chungchanga zawhna hi chhangin Rawmi chinna hmunte chu Hmunpui Saiphai zau-a ram hectare 50; Khawzawl-a ram hectare 43.50 a zau; Kawlkulh-a ram hectare 21.50 a zau; Khawhai leh Damdiai-a ram hectare 20 ve ve-a zau ah; Dampui-a ram hectare 8-a zau ah; West Phaileng-a ram hectare 23-a zau ah; Kawrtethawveng-a ram hectare 30-a zau ah; Nalzawla ram hectare 19-a zau ah; North Chaltlang-a ram hectare 18-a zauah; Thingthelh-a ram hectare 31.50 a zau leh Bairabi-a ram hectare 6 a zau, a vaiin ram hectare 290.50 a zau-ah chin a ni tih a sawi.

Raw tiak hi mi 3, F. Vanlalpeka Upper Khatla, F. Lalhriatpuii Ramhlun South leh J. Lalmalsawma Maubawk-ten pakhat Rs. 70 zelin an Supply tih pawh Chief Minister hian a sawi a, a chingtute hnenah tiak 1,18,700 phun tura pek tawh a nih thu leh, Department Centre-ah tiak 300 phun tura pek an ni tih sawiin, a vaiin Raw tiak 1,19,00 an Supply tawh thu a sawi a, heng Rawmi tiak an phun te hi thla 4 atanga thla 5 vela upa an ni tawh hlawm tih a sawi bawk.

Zawhna dang a chhannaah Chief Minister Zoramthanga chuan, Brandisii chu Lengpui, Hmunpui, Darlak, Kawnpui, Lunglawn, Phungchawng, Hmunpui Saiphai Zau, Khawzawl, Kawlkulh, Khawhai, Thingthelh, Bairabi, North Chaltlang leh Vawngawnzo-ah chin a ni tih a sawi bawk a. A chi hi pakhat Rs. 80 zelin F. Lalhriatpuii'n a supply a, a lei nan cheng nuai 166.7 sen tawh niin, SEDP leh National Bamboo Mission hnuaiah Mau chingtute chu cheng nuai 153.4 pek an ni tawh tih a sawi bawk. (El-a)