Chanchin thar thenkhat :

Dan bawhchhe man tam tawh

Nimin thleng khan Mizoram-ah The Mizo-ram (Containment and Prevention of Covid-19) Ordinance, 2020 bawhchhia mi 13,617 man an ni tawh a, an pawisa chawi tlingkhawm pawh Rs. 29,56,000/- a tling tawh bawk. Sawrkar thuchhuah in a tarlan danin The Mizoram (Containment and Prevention of Covid-19) Ordinance, 2020 bawhchhia hi Police ten mi 8789, Flying Squad in mi 3293 leh Lock Task Force ten mi 1535 an man tawh a ni. District hrang hrang zingah Aizawl District chu dan bawhchhia man tamna ber niin mi 6154 zet manin an pawisa chawi tlingkhawm pawh Rs. 14,22,400/- zet a ni a, Serchhip District-ah mi 1167 leh Lawngtlai District-ah mi 1126 man tawhin Dan bawhchhia man tlemna ber Kolasib District-ah chuan mi 362 chiah man an la awm a ni.

Khawzawl-ah In pakhat thiat
Khawzawl District Disaster Management Authority (DDMA) thurel angin Khawzawl Electric Veng-a R. Liankhuma In chu nimin khan hnatlang-a thiah a ni. Thudawn danin R. Lian-khuma In, RCC Building hi chhawngkhat-a sang niin In hi a khik nasat avangin nikum kumtir lam khan a luahtuten an chhuahsan a, hemi hnu hian luahtu awm lovin a awm zui ta a. Vantlang tana him tawklo nia a lan avangin Khawzawl DDMA chuan thiat tura relin nimin khan Khawzawl Electric Veng mipuite leh IR Police te chuan hnatlangin an thiat a, an senghawi theih ang ang te an senghawi hnuah Vawiin hian khawl hmanga thiah zui a ni ang.

August thla ah inthlan beisei
LAD Minister, K. Lalrinliana chuan tunlai hian a bial (Kolasib) chhung hmun hrang hrang tlawhkualin August thla ah VC inthlan buatsaih theih a beisei thu a sawi a, khawtlanga roreltu Village Council (VC) hun chu COVID-19 inkhar-khip inkaihhruaina zul zuiin a vawi hnih nan pawh sei leh mek a ni a; inthlan hun tur tihchian theih ni rih lo mah se August thlaah chuan VC thar thlanna buatsaih theih a beisei thu a sawi bawk.

Remna ngaihlu turin chah
MNF Vice President, Lalthlengliana chuan nimin-a Remna Ni pualin mipuite hnenah thu-chah sawiin, Mizoram mipuite chu MNF Party aiawhin chibai a buk a, Mizoram in rambuai leh remna a neih dan te sawiin, Zoram mipuite chu remna ropui tak kan neih ngaihlu-a vawng nung reng turin a chah bawk.

Congress in chibai buk
Nimin a Mizoram in Remna Ni a hman pual khan Congress Party chuan Mizoram mipui zawng zawng chibai bukin, zalenna sualtu hnam sipaite leh remna siamtu zawng zawngte zahna chibai an buk a, Mizoram-in inremna hlu tak a neih theih nana tha thawhtu zawng zawngte an ngaihlu hle tih thuchhuah siamin an tarlang bawk.

PM-GKAY kalpui zel dawn
Miharsa zawkte tana ruahmanna siam, Pra-dhan Mantri Garib Kalyan Ann Yojana (PM-GKAY) chuan kumin November thla thleng a awh dawn tih Prime Minister chuan a sawi. He thu hi nimin tlai-a TV kaltlanga thu a sawinaah Prime Minister, Narendra Modi chuan a sawi a, PMGKAY hnuaiah hian ramchhunga mipui, mi vbc. 80 chuangin thla tin buhfai kg. 5 a tlawna an lak thin thu a sawi a, thla thum chhung (April, May leh June thleng) lak theih tura ruahmanna siam chu November thla thleng pawhsei a nih thu a sawi a ni. Prime Minister hian thla tin chhung-kaw khat tan Chana kg. 1 November thla thleng lak a nih tur thu a sawi bawk.
PMGKAY hi hri leng vanga ram pum inkharkhip chhunga khawsak harsa zawkten ei leh in bakah sum leh pai an neih theih nana tan-puina Scheme duan a ni a, he Scheme hnuaiah hian Mizoram mipuite pawhin tanpuina an dawng a ni. Tun tum hi Prime Minister-in hri leng hluar hnua ram mipuite hnena thuchah a sawi tum rukna a ni.

Ram him zawkna atan Mobile Apps 59 khap a ni
Sawrkar laipui chuan India ram him zawkna atan Mobile Apps 59 a khap a, heng zingah hian Tik Tok, Mobile Legends, Likee leh Shein-te a tel. Ministry of Information Technology chuan heng Apps atanga information hmuh theihte chu India ram himna, inpumkhatna leh venhimna lam tiderthawng thei ni a hriat a nih avangin Apps 59 hi khap a nih thu a sawi a ni. Kum rei vaklo atang khan technology lama hmasawnaah India chu hmahruaitu dinhmun hauh chhovin, digital space-ah primary market a ni a. Hetihlai hian Data Security lamah leh India ram mipuite privacy vawnhim kawngah fimkhur ngaihna leh mangan rukna a awm thin a. Hei vang hian heng Apps 59 hi block turin thutlukna a siam a ni.

HSSLC leh HSLC Exam buatsaih dawn
Mizoram Board of School Education (MBSE) chuan kumin a HSSLC Exam zo hmanlo te tan Vawiin-a hian Mizoram hmun hrang hranga Exam Centre buatsaih ah te Exam a buatsaih dawn a, hemi atan hian ruahmanna chi hrang hrang siamin HSLC Exam-a Subject bat nei te pawhin Exam hi an nei nghal dawn a ni.

Comments

Chhiar Hlawhte