Mizoram-ah hri kai 23 hmuh belh leh an ni

Niminpiah-a ZMC Laboratory-a Sample enfiah te atangin COVID-19 hri kai mi 23 hmuh belh leh an ni a, an vai hian Aizawl District mi leh sa vek an ni.
ZMC Laboratory-ah hian niminpiah khan Swab Sample 358 enfiah niin heng atang hian hri kai 23 te hi hmuh belh an ni a, hri kai hmuhchhuah thar te hi mipa vek niin mi 22 chu Assam Rifles mi leh sa an ni a, Assam Rifles COVID-19 vei hmuhchhuah tharte hi kum 24-56 inkara upa niin India ramchhung hmun hrang hrang atanga lo haw khawm niin, an zingah hian Mizo pakhat (positive contact) telin a bak zawng hnamdang an ni a. Quarantine Facility a khunghran lai vek an ni a, COVID-19 symptoms nei an awm rih lo. Hri kai hmuhchhuah zinga Assam Rifles mi leh sa ni ve lo hi kum 34 a upa, Nepal atanga lo haw niin COVID-19 symptoms a neih vanga ZMC a admit lai mek a ni thung. ZMC-a Sample enfiah zingah hian tunhnaia hri kai hmuhchhuah ZMC-a Doctor in Futsal a khelhpui leh an chhungte pawh telin hri kai an awmlo thung a ni.
Nimin khan Mizoram-a COVID-19 hri kai enkawllai mi 3, Thenzawl-a mi 2, Mamit-a mi pakhat leh ZMC-a mi 2 te chu an dam hnuah anmahni enkawlna hmun atanga chhuahtir an ni thung a, heti hian nimin thleng khan Mizoram-ah COVID-19 hri kai hmuhchhuah 384 awm tawhin mi 198 te chu enkawl dam an ni tawh a, tunah hian hri kai enkawllai 186 an la awm mek thung a ni.

COVID-19 hri kai 35,175 hmuh belh leh an ni :
Darkar 24 kalta chhung khan India ramah hri kai 47,704 hmuhchhuah leh niin mi 35,175 te chu damah puan an ni thung. Ministry of Health & Family Welfare chhinchhiahna atanga a lan danin darkar 24 kalta chhung khan India ramah sample 5,28,082 enfiah leh niin heng atang hian hei kai 47,704 hmuh leh a ni a, heng te nen hian India rama hri kai hmuhchhuah chu 14,83,156 an tling tawh a, tun thlengin mi 9,52,743 te chu dam-ah puan ni tawhin hri kai enkawllai 4,96,988 an awm mek bawk a, hri kai hmuhchhuah atanga enkawl dam hi za zela 64.23 an tling a, hri kai enkawllai aiin enkawl dam hi 4,55,755 in an tam zawk a ni. India rama hri kai zingah darkar 24 kalta chhungin mi 654 ten nunna chan lehin hri kai zinga nunna chan hi 33,425 an tling tawh bawk a, hei hi hri kai hmuhchhuah atangin zaa 2.25 an tling bawk a ni.
ICMR chhinchhiahna atanga a lan danin tun thlengin India ramah COVID-19 hri kai enfiahna Laboratory 1310 a awm tawh a, heng zinga 906 te chu sawrkar Laboratory niin a dang 404 te chu Private Laboratory a ni thung a, Real-Time RT PCR Laboratory 668 awmin TrueNat Laboratory 536 a awm a, CBNAAT Laboratory 106 awmin tun thlenga Sample enfiah chu 1,73,34,885 a tling tawh bawk a ni.

Comments

Chhiar Hlawhte