Mizoram-ah hri kai 20 hmuh belh leh an ni

Niminpiah khan Mizoram-a Swab Sample enfiah zingah hri kai thar 20 hmuhchhuah belh leh an awm a, Mizoram-ah hri kai hmuhchhuah zawng zawng chu 317 an tling ta a ni.

Mizoram sawrkar thuchhuah tarlan danin niminpiah khan ZMC Laboratory-ah Swab Sample 279 enfiah niin hri kai hmuhchhuah 18 an awm a, midang 261 erawh chu hri lakah an him tih finfiah a ni. ZMC Laboratory-a COVID-19 hri kai hmuh thar te hi mipa vek, kum 23-59 inkar niin, Aizawl District mi vek an ni a. An zinga 16 te chu Assam Rifles sipai, Zokhawsang-a Quarantine lai mek niin Assam atanga lo kal 13, Delhi atanga lo kal 2 leh Mizoram mi leh sa 1 an ni a, Mizo pakhat leh hnamdang 15 an ni. Anni baka hri kai hmuhchhuah thar te hi NDRF, Lungverh ami 1 leh hnamdang Civil mi 1 hri kai hmuhchhuah awm bawkin anni pahnih hi Assam atanga lo kal, COVID-19 symptoms neilo ve ve an ni.

Niminpiah vek khan Lunglei TrueNat Laboratory-ah Sample 27 enfiah niin COVID-19 hri kai mi 2 hmuh belh leh an ni bawk a, heng mite hi BSF sipai ve ve, kum 57 leh kum 53, Uttar Pradesh leh Uttarakhand atanga lo haw an ni a, July 1 atanga quarantine an ni.

Heti hian Mizoram-ah nimin thleng khan COVID-19 hri kai hmuhchhuah mi 317 awm tawhin mi 168 enkawl dam an ni tawh a, tunah hian hri kai enkawllai 149 an awm mek a, hri kai hmuhchhuah atangin enkawl dam hi zaa 53 an tling tawh a ni. Mizoram-a hri kai hmuhchhuah 317 zinga 118 (37.22%) te hi Paramilitary Forces (BSF/AR/NDRF) te niin midang 199 (62.77%) te hi Civil mi an ni thung a. Nimin thlenga hri kai enkawllai 149 zinga 118 (79.19%) chu Paramilitary Forces (BSF/AR/NDRF) mi leh sa niin Civil mi enkawllai chu 31 chiah an awm tawh a, hei hi hri kai enkawllai atanga chhutin 20.80% a ni thung.

COVID-19 hri kai 37,724 hmuh belh leh an ni :

Darkar 24 kalta chhungin India ramah COVID-19 hri kai hmuhchhuah thar 37,724 an awm leh. Darkar 24 kalta chhung khan India ramah Sample 3,43,243 enfiah leh niin hri kai 37,724 hmuh thar awmin India rama hri kai hmuhchhuah chu 11,92,915 an tling ta a, darkar 24 kalta chhung khan mi 28,472 te chu dam-ah puan niin tun thlengin mi 7,53,049 te chu dam-ah puan an ni tawh a, hei hi hri kai hmuhchhuah atangin zaa 63.12 a ni a, tunah hian hri kai enkawllai 4,11,133 an awm mek a ni. Darkar 24 kalta chhunga hri kai enkawl nunna chan mi 648 te nen hian tun thlengin mi 28,732 ten nunna an chan tawh a, hri kai atanga chhutin nunna chan hi za zela 2.40 an tling bawk.