Farmer Producer Company 3 te Organic Certificate hlan

Mission Organic Mizoram (MOM) hnuaia Farmer Producer Company pathum (3) hnenah Organic Certificate hlanna chu nimin khan neih niin Agriculture Minister, C. Lalrinsanga chuan khuallian niin a hmanpui.

Agriculture Department Committee Room-a he hun hmanna ah hian Agriculture Minister chuan Farmer Producer Company (FPC) ten kawng chi hrang hranga endikna paltlanga Organic Certificate an dawng thei chu a lawmpui tih sawiin, Mizoram tan pawh mellung pawimawh tak a ni, a ti a. Organic Certificate chu inthlahdah vanga hun reilote chhunga hloh leh theih a nih avangin engtiklai pawha tha thlah lova kal zel turin FPC te a chah a. Kutdawh rilru pu lova, India ram mai ni lo, khaw-vel huapa sumdawnna kalpui ve thei ngei turin FPC te a fuih bawk.

MOM hnuaia Farmer Producer Orga-nisation (FPO) pathum (3) – Reitlang Organic Producer Company (ROPCO), West Phaileng Block Bird Eye Chilli Grower Society leh Turmeric Grower Group, Kolasib te hnenah Organic Certificate hlan an ni a. Organic Certificate nei tur hian Farmer Producer Company te hian fiahna kalkawng thui tak an paltlang a ngai a, a tlem berah kum 3 chhung tal fiahna hrang hrang paltlang ngai a awm a ni. FPO dang 11 te pawhin Organic Certificate hi neih ve thuai tumin tunah hian hma an la mek bawk a ni.